US Congress züngsem 78-i Turkey President dang Pastor chioktsü ajungshir

February 20, 2017 (Agencies) : US Congress nungi züngsem 78-i Turkey President, Recep Tayyip Erdogan dang Khristan sannüker ka chioktsü atema mepishia züluogo.
North Carolina nung sannükerji Khristan tamangba nung ajemdaker, taila kiralongraba ken ka nung aija tepuokdak yua lir.
Senate Foreign Relations & House Foreign Affairs Committees nungi lennirtemi President Erdogan dang American pastor Andrew Brunson chioktsü atema tezüluba ka agütsü. Iba tezüluba nung senators aser representatives 78-i sign süa lir.
Brunson ya U.S senso ka lir aser pa Black Mountain, North Carolina nungi lir aser pai küm 20 tashi Turkey nunger den yaritepa arur.
“Yaküm October ita nung Brunson tim mesüi apu aser pa nem legal counsel aser American consular services teyari dena magütsür” ta shidi nung shia lir.
“Thanksgiving, Christmas aser pa tasoba anogotem ajak Turkey nung tepuokdak amung. Nisung 10 ayuba takdang ka nung tepuoker 19 lir aser parnok rongnung Khristan tamangerji pa dang lir,” ta American Center for Law and Justice-i metetdaktsü.
“Ni aser U.S. ketdangsertemi Turkey dang Brunson pua aliba indang aiben shia arur. Pa United States ket nung agüjang ta onok külemi iba temepishiba agütsür” ta Tennessee nungi Republican Sen. Bob Corker-i Facebook post ka nung ashi.
Yaküm October ita Pastor Brunson ya kiralonglar telok ka nung züngsema lir ta tai tonglokja aitsü.
“Pa kiralongrar telok nung züngsemba indang kuli kecha mali. United States aser Turkey tsüngda küm aika tesentaktep tajung aliba ajanga tajangzük nguyonga aruogo aser onoki iba tesentaktep maneni alitsü imlar. Tang ya linüktemi nüjiso aser ozüng nung aliba ama inyaksangshitsü mapang ka lir” ta ACLJ-i Turkey President dangi züluba shidi nung shia lir.
Par jala kiyimba sentong thinenogo kechiyong par jalai tebu nem meindaktsünür, ta ACLJ-isa ashi.
Congress nungi shidi züluba den külemi ACLJ-ia Secretary of State tasen shimsang, Rex Tillerson dang Pastor Brunson indang tezüluba ka agütsüogo.
International Christian Concern ajanga ashiba agi Brunson-i Izmir, Turkey nung Protestant arogo ka tenzüka lir.
Brunson aser pa kinungtsü Norine na yaküm October ita tena indang visa renew asütsü indnag olemteptsü jaok, saka Turkey police-i tena apu.
Iba sülen anogo 13 lir Norine chiok saka Brunson ji kiralongrar telok ka nung züngsema lir ta tai tonglokja tepuokdak ayu.
ACLJ aser ICC nati ashiba agi, Turkey nung sorkari kijatem dak tai tongloktsüdang kiralongrar telok nung züngsema mesüra tesentaktep aliba onük nung aitsür.