US Defence Secretary, Carter-i Europe semdangtsü tenzüker

Madrid, October 05 (Agencies): US Defence Secretary, Ashton Carter-i Europe semdangtsü maparen tenzüka, Spain kübok Madrid yimti tanü Hombar nü tonga aoba osang jangjaogo.

Russia-i par mitkar tayimtsü amshia Syria nung amakba maparen tenzükba aser Europe ajungai refugee nisungtem den sentakba tebilemtsü khuret benokba mapang ka nung Carter-i tan Europe semdangtsü tenzüker lir.

Carter-i tan Europe semdangdang par linüki aniba alima teloktep mitkartemi par tayimtsü amshia Afghanistan nung tentetba Kunduz yimti nung mozü ketdangsertem densema, nisung 22 tashi tepsetba ajanga tensa mejungi kümdaktsüba ken oa bentettsü alizüng ayuba osang jangjaogo.

Carter-i anogo 5 agia Spain, Italy aser Britain semdangba den külemi, Brussels yimti nung ayongba North Atlantic Treaty Organization (NATO) ministerial summit nung shilem agiba ajanga Russia-i Ukraine anema tashiyim inyakba aser Europe-i tang ajurushia aliba refugee khuret külemi amalitepa abentsü tezüngzüktep agitsü renema lir.

Aji oda, Carter-i tan Spain semdangdang, Spain lenirtem den ajurutepba den külemi, Spain kübok Moron de la Frontera mitkar tesep semdanga idakji yutsüba US marine mitkar züngsem 2200 den ajuruteptsü sentong renema lir.

Arishi küm 61 tain Carter-i taküm 2015 küm February ita nungi tenzüka ita 8 buba tashi Pentagon lenisüba menden abenba osang jangjaogo.