US Defence Secretary-i Modi & Sitharaman den ajurutep

New Delhi, September 26 (Agencies): India aser US tsüngda tesentaktep akangshitsü aser amalitepa inyaktsü atema tanü US Secretary of Defence, James Mattis aser Prime Minister Narendra Modi na ajurutepdang jembi.
India aser US nati regional aser alima jenjang nung kanga amalitepa mapa inyakba atema senden nung PM Modi-i tenüngsang agütsü, ta PMO sangdong ka nung metetdaktsü.
Taküm June ita United States semdangdang Modi-i tir Donald Trump den onük aika benoka lemsatepa liasü, ta PMO-isa ashi.
PM Modi aser US Tir Trump na senden amendang linük anaprongi tesentaktep akangshitsü atema tenangzükba agitepa liasü.
Tanü Mattis-i prime minister dang linük ana indang tesentaktep akangshitsü aser taoba senden nung lemtetba onüktem mapa inyaka aruba osang lemsatepa liasü.
US Defence Secretary Mattis-i tanü Defence Minister Nirmala Sitharaman den mezüng ajurutepa senden amen aser iba sülen tenati külem osangbener senden ka nung jembi.
Mattis-i osangbener dang ashiba agi, US indang tebilembaji India den defence tesentaktep akangshitsü atema lir kechiyong US-i India ya regional stabilizer ka ama bilemer.
“Indo-Pacific region nung yimjung aser azük aru aliba tarutsü nüngdaker aser ibaji international order takang ka aser international law akhümtsübuba ajanga dang tongtettsü” ta Mattis-isa ashi.
“Mangatettep aliba onüktemji tim tesüi dang angatetteptsüla ta onoki bilemer. Ken o temji international law tangatetba nung angatetteptsüla. US-i international law pusema nungiter ta Secretary Mattis-i ashiba atema ni kanga pelar” ta Sitharaman-ia osangbener dang ashi.
“Indo-Pacific nung US-i India den külemi maritime security atema aser HADR (Humanitarian Assistance and Disaster Relief) tensa nung first responder ama inyaktsü ta pai ashiba ni pela agizüker” ta laisa shisem.
Laisa ashiba agi, Mattis tenati Indian Ocean aser Asia-Pacific Region nung maritime security aser ano regional connectivity atema jembitep.