US Defence Secretary James Mattis mapa doktsür

Washington, Luchii/Dec. 21 (Agencies): US Defence Secretary James Mattis mapa nungi anener, aser US ketdangsertemi mapa yutsürtem rongnung pa ya tasenba lir.
Tir Trump-i Syria nungi mitkartem agiener ta sangdonger (General Mattis-ibo anema nokdak ta angateter) anogo ka lir James Mattis-i pa mapa nungi anener ta sangdong.
Gen Mattis-i pa mapa nungi anentsü asoshi shity züluba nung Trump tena sentong yangluba nung obang mapur ta ajang ajanga shia lir.
Tiri pa den apet kar shimtsü tashi aser temeden lir, ta pai ashi.
Arishi küm 68 tain Gen Mattis-i iba mapa ya Tsüklai/February nung yutsütsü. Tir Trump-i pa melener tenüng mashi saka yakta tasen ka shimtsü ta shiogo.
Mattis mapa nungi anentsü sangdongba osang angashia yimten yimsüsür Congress züngsem telok anatsülen aoksatepa liasü.
Senate Majority Leader Mitch McConnell ya Trump den kasa Republican Party nungi lir aser tir den Gen Mattis obang mapuba ajanga mapa doktsür ta sangdongba angashia tekolok shisatsü nunga tim atemer, ta pai ashi.
Gen Mattis aser tir na policy aika nung mangatettep adoka liasü.
Trump dangi indang indanga shity züluba nung pai tembartem akhumtsübua amshir aser arok kümzüktsü asoshi America nunger tashi indang hadir ajunga amshir, ta shia lir.
“Iba amala aser tanga ken o nung nai angatetba den tajungtiba nung külemi alir Secretary of Defense ka alitsü nü dak temeden lir asünung, kü jenjang nungi ni alutsü tim ta ni angateter,” ta pai zülu.
Iba shity nung Syria nungi mitkartem anir aruba indangbo shia mali saka iba linük nungi mapang melie mitkartem agienba ajanga timtem ajurutsü, ta Gen Mattis-i taoba mapang shia liasü.
Pai Russia aser NATO amala ken o tem nung tena obang mapubatema shisema lir.
Pa melen nübu tasen ka shimtsü asoshi mapang peria agüja pai iba mapa Tsüklai/February tatem tashi inyaktsü, ta metetdaktsü.