US Defense lenisang, Carter-i Iraq semdanger

Baghdad, December 16 (Agencies): US Defense Secretary, Ash Carter-i tanü Bodbar nü Iraq semdanga Syria aser Iraq na nung tesep tenteba Islamic State (IS) kiralongrar telok meshimeshia samatsütsü lenmang bushiba osang jangjaogo.

Carter-i mapang jelia semdangtsü osang memetetdaktsüi tanü Baghdad tonga aoba sülen par US mitkar aser Iraq lenirtem den ajurutepa liasü.

Par US-i mitkar Apache helicopter tayimtsü aser mitkar züngsemtem timba yokshia IS telok anema raradaktsütsü sentong renemba osang ka Carter-i tanü Iraq lenirtem den lemsatepba osanga jangjaogo.

Tan Iraq semdangdang par US-i aniba alima teloktep mitkartemi IS meshimeshia samatsü tasa aser lenmangtem tajungba bushitettsü alizüng Carter-i yur pai par mitkar lenirtem dena ajurutepa laisü.

US-i par mitkar züngsem 3,500 shi Iraq nung tang yuja lir saka par linüki mitkar züngsem maneni yokshitsü lemteta lir.

IS telok lenirtem pua parnok tepsettsü nükjidong nung US-i par special commando mitkartem Iraq-i yoktsü terenemshiba agia aliba osanga jangjaogo.

US Tir, Barack Obama-i IS anema taoba mapang nungi tesashiba raratsü telemtetba tan Hombar nü agiba sülen par defense lenisang, Carter-i tan Iraq tsüngdong semdanger lir.