US Defense lenisang, Carter-i Saudi chuba den ajurutepogo

Jeddah, July 22 (Agencies): US Defense Secretary, Ashton Carter-i Saudi Arabia chuba, King Salman bin Abdul Aziz den Saudi Arabia kübok Jeddah nung tanü Bodbar nü ajuruogo.

Iran den nuclear tezüngzüktep agiba ajanga bener arutsütsü aliba tajangzük den sentakba onük lemsateptsü nükjidong nung Carter-i tanü Salman den ajurutepa liasü.

Alima tashi abenba linük lenirtem aser Iran nati tan July 14 nütu nuclear tezüngzüktep agi saka iba tezüngzüktep anemer mesüra agizüker ta Saudi sorkari tanü tashi osang metetdakja mali.

Chuba Salman den ajurutepba den külemi, Carter-i Saudi defense minister, Mohammad bin Salman Al Saud dena tanü ajurutepba sülen Jordan’er mitkar lenirtem den ajurutepa senden amentsü asoshi Jordan bushia aoba osang jangjaogo.

Iran-i Middle East nung tensa mejungi kümdaktsütsü asoshi inyakba maparen nokdangtsü aser kiralongrar telok tetsüti, Islamic State (IS) anema raratsü asoshi par US-i tasa balala atonga inyakba den sentakba onük kar Carter-i tanü Saudi lenirtem den ajurutepdang lemsatepa liasü.

Ano, US aser Saudi Arabia na tsüngda missile defense aser cyber o tzüyim security den sentakba maparen amalitepa inyaktsü onüka tanü lenirtemi par senden nung benokba jembiba osang jangjaogo.

Carter-i yashi, Mongolbar nüa Jerusalem semdanga Israel Ato Kilonser, Benjamin Netanyahu den ajurutepa alima tashi abenba linüktem aser Iran nati tawa agiba nuclear tezüngzüktep den sentakba onük benoka liasü.

Netanyahu den ajurutepba sülen Carter-i Jordan anüdoklentip tsütsülen tentetba alima teloktep mitkar tesep ka semdanga idakji tenzükba mitkartem den ajurutepa senden amen.

US densemba alima tashi abenba linük lenirtemi Iran den nuclear tezüngzüktep agiba ajanga US aser Israel na tsüngda tesendaktep mejungi akümtsü tenzükba yong par linük ana tsüngda tesendaktep junga ayutsü nükjidong nung Carter-i yashi Netanyahu den ajurutepba osang jangjaogo.