US Defense Secretary, Ashton Carter-i SCS semdanger

Manila, April 15 (Agencies): US Defense Secretary, Ashton Carter-i mangatettep adoka aliba South China Sea (SCS) ajangdangba US aircraft carrier rong ka tanü, Hokolbar nü semdangogo.
Carter-i Philippines  nungi anülulentip tsütsüleni mile 70 shi pilar, SCS kübok Luzon asetkong ajangdangba aser nuclear tashi aliba USS John C. Stennis rong tanü ghonda 2 shi agia semdanga liasü.
“US mitkar tashi tali amshiba ajanga SCS nung tensa mejungi kümdaktsür ta China-i bilembaji tim masüba tangatetba lir,” ta Carter-i par US tzüyim sepaitem den ajurutepba sülen metetdaktsü.
Totzü aser senti gas jenti angudak, SCS ajunga par meyong ta China-i züngshir saka kidangsüa aliba Brunei, Malaysia, Philippines, Taiwan aser Vietnam nunger densemba linüktemi SCS China kija indang masü ta shia, China den mangatettep adoka lir.
Carter den külemi, Philippines Defense Secretary, Voltaire Gazmin-ia Stennis rong semdangba osang angazükogo.
Carter-i Manila nung agiba US aser Philippines teloktep mitkar terenemshitsü sentong, Balikatan tembangba sentong nung shilem agiba sülen Stennis rongji semdanga liasü.
Stennis rongi Western Pacific tzüyim nung ita asem tashi duty inyakba osang ka rong sepaitem indang group commander, Rear Admiral Ronald Boxall-ia tanü metetdaktsü.
Carter-i tan anogo 6 tashi agia Asia semdanga senzüdang par US-i yimji yimjung lidaktsütsü aser mangatettep ken o ajunga ozüng nung ajemdaker bentettsütsü asoshi inyakba osanga metetdaktsüogo.
Ano külen, US mitkartemi Philippines mitkartem den aroki lokteper mitkar terenemshitsü sentong agiba aser mangatettep adokba SCS nung par mitkar rongtem yokba ajanga US-i SCS nung mitkar tashi amshiba kuli sayur ta China Foreign Ministry otongdar, Lu Kang-ia metetdaktsüogo.
Mangatettep adokba SCS nung Philippines mitkartem den lokteper US tzüyim sepai rongtem partrol senzüdaktsütsü densema, US aser Philippines mitkar na tsüngda tesendaktep tajungba akümtsü asoshi US o Philippines nati nangzüktepba maparen aitsüba olen ka China-i tan Brehostibar nü metetdakja liasü.