US Defense Secretary, Carter-i Afghanistan semdang

Bagram Air Base, December 09 (Agencies): US Defense Secretary, Ash Carter-i Afghanistan linük tanü, Hokolbar nü semdangogo.
“Afghanistan’er peisasa pei madak yimsü asütsü temeten kümzüka ayutsü maparen nung ozü America-i par linük teti pusema nungitsü nangzüker,” ta tanü, Kabul yimtiba tonga aoba sülen Afghanistan Tir, Ashraf Ghani den aroki osangbener den ajurutepdang Carter-i sangoktsü.
Pai tan Afghanistan semdangba ya Pentagon lenisang ama tan tatemsüa Afghanistan semdanger asütsü.
Carter-i tan Afghanistan semdangba sülen pai abenba defense secretary mendenji taoba mitkar lenir, General James Mattis nem melenoktsütsü renema lir.
“Kiralongrar anema raratsü nunga ozü America-i Afghanistan aser par mitkartem den aroki lungjemer aki ama raratsü renema lir,” ta shia, par Tir tasenba, Donald Trump lenisüba küboka par US linüki aki ama kiralongrar anema raratsü temulungtetba aliba olen ka Carter-i shisem.
Afghanistan mitkartem nem Taliban telok anema takok ngua raratsü terenemshiba agütsütsü atema US-i par mitkar züngsem 10,000 shi tang Afghanistan nung yuja aliba den, par special operations mitkartemi al qaeda aser Islamic State kiralongrartem anema raraba osang bushiteta lir.