US den nuclear onük dang benoka jembitsü: Ayatollah

Dubai, September 09 (Agencies): Iran-i United States (US) den nuclear tezüngzüktep agiba den sentakba onük dak alaka tanga onük benoka mejembitsü renemba olen ka Iran’er Supreme Leader, Ayatollah Khamenei-i tanü Bodbar nü metetdaktsüogo.

Ajisüaka, par Tehran-i Syria nung adoka aliba mangatettep ken o bentettsütsü den sentakba onük US den benoka jembitsü renemba osang ka Iran Tir, Hassan Rouhani-i yashi Mongolbar nü sangoktsüba osang aser Ayatollah-i tanü metetdaktsüba osang naji khen yongi balala aliba osang bushitetogo.

“Ozü Iran-i US linük densemba alima tashi abenba linüktem den nuclear tezüngzüktep dang agi. Anungji, ozü linüki US den tanga onük benoka jembitsü memulunger,” ta Ayatollah-i nenshia ashi.

“US sorkari par alizüng atongtsü nükjidong nung ozü Iran amshir. Anungji, par linük den jembiteptsü khen yongi memulunger,” ta paisa shisem.

US densemba alima tashi abenba linüktem den nuclear tezüngzüktep agia aka, taoba mapang nungi tenzüka tesendaktep mejungi aruba Tehran aser Washington na tsüngda tanga tesendaktep mejungi aliba osang bushiteta lir.