US den nuclear tezüngzüktep agitsü jangra mali: N Korea

Seoul, July 21 (Agencies): Alima tashi abenba linük lenirtem aser Iran nati tawa agiba ama US den nuclear tezüngzüktep agitsü asoshi North Korea-i jangra maliba olen ka par foreign ministry-i tanü Mongolbar nü metetdaktsüogo.

US mitkar tashi nungi par N Korea kümzüka ayutsü maparen nung par nuclear sentongi tongti shilem agir ta shia, US den nuclear tezüngzüktep agitsü mejangraba olenji foreign ministry-i tanü metetdaktsü.

“Iran aser ozü N Korea na kasa jenjang nung benoka jembitsüji tamashi lir kechiyong ozü linük ya US mitkartemi mapang shia amokmerenba linük ka lir,” ta foreign ministry otongdar kati ashi.

“Ozü linük indang nuclear sentong anentsü mesüra ozü linüki yanglua rizüngba tongpang nung amshitsü nuclear osettsüset bendanga agütsütsü tebilemba khen yongi mali,” ta otongdasangi nenshia ashi.

US densema alima tashi abenba linük lenirtemi Iran’er nuclear sentong anentsü tezüngzüktep ka Iran den taoba hopta agiogo.

Iran-i par nuclear sentong anenba melena US, European Union (EU) aser United Nations (UN) nungeria par linük anema benokba tenokdangba sentongtem agientsü nangzüktepa lir.

N Korea-i par nuclear aser ballistic missile sentong takok ngua meinyakdaktsütsü nükjidong nung US densema EU aser UN nati N Korea anema tenokdangba sentong balala tang benoka lir.