US den Syria senden amentsüji amajok lir: Lavrov

Moscow, December 14 (Agencies): United States (US) lenirtem den Syria senden amenba ajanga tajangzük kecha bener marutsüba olen ka Russia Foreign Minister, Sergei Lavrov-i tanü, Bodbar nü metetdaktsüogo.
“US lenirtem den Syria nung tensa tajungba kümdaktsütsü aser par nübur takümtem kümzüktsü atema senden aiben menogo saka item senden ajunga amajok dang aküm,” ta shia, Syria den sentakba nung US linüki amalitepa meinyakba atema US aitsüba olen ka Lavrov-i metetdaktsü.
Paisa ashiba agi, Moscow-i Washington den tongtepratepa liaka, par linük anati tezüngzüktep agitsü atema ajurutep shia, Washington-i telemtetba tajung magir.
Par Russia linüki Syria den sentakba nung Turkey linük den aroki lungjemer inyaktsü atema tenzükba indang shia, “US linük denbo Turkey linük den aroki lungjemer inyakba ajanga Syria ken o takok ngua bentettsütettsü akok,” ta Lavrov-i sangoktsü.
Syria-i ajurushia aliba mangatettepbaren agientsütsü atema yimjung tezüngzüktep agitsü mapatong nung par linük ana tangatetba mesütepi küma, par linük ana tsüngda tensa mejungi akümtsü tenzükba sülen US-i taküm October ita nungi tenzüka, Russia den Syria senden amentsü memulungi aruba osang bushitetogo.
Iba mapang nungi tenzüka, tanü tashi nung par linük anati aroki lungjemer Syria den sentakba telemtetba tajung agia mali.