US den tongpang mashika raratsü renema lir: Kim

Seoul, October 10 (Agencies): North Korea-i Us linük den tongpang mashika raratsü renema aliba osang ka N Korea lenisang, Kim Jong Un-i tanü amokmerena metetdaktsüogo.
N Korea madak yimsü asütsü tashi benokba Worker’s Party yimtren telok tentetter küm 70 ajungba bilemteta Pyongyang yimtiba nung amongba sentong nung tanü shilem agidang Kim-i iba amokmerenba olenji sangoktsü.
Pyongyang kübok Kim Il Sung Square nung agiba sentong nung N Korea mitkartemia tongti shilem agiba osang jangjaogo.
Ano, bendanger lenir kar den külemi, China lenir tarensen nung 5 buba jenjang abensang, Liu Yunshan-i tanü sentong nung tongti shilem agiba osanga jangjaogo.
Tanü sentong nung shilem agiba jakdang Kim-i tebu aser tebou Kim Jong Il aser Kim Il Sung na aremdak, Kumsasan Palace-i yasüng, Hokolbar aonung oa tena nem aküm agüja liasü.
Alima dang par mitkar tashi sayutsü nükjidong nung ayonga agiba sentong nung mitkartemi par tongpang nung amshitsü tank aser missile launcher-tem amshia mitkar parade sentong balala tanü sentong nung agiba osanga jangjaogo.
Tanü sentong nung N Korea mitkar truck gari 600 aser armoured gari 200 dak temai shilem agiba osang ka US-Korea Institute-ia par website, 38 North ajanga metetdaktsüogo.
Ano, Pyongyang-i par long-range rocket mesüra satellite tendangtsü asoshi sentong renemba osang taoba mapang metetdaktsüba ama meinyaktettsü akok ta par linük tendanger mongin, World Insitute of North Korea Studies ketdangser, Ahn Chan-ia metetdaktsüogo.
“N Korea-i tawa amokmerenba ama par missile tasen kadoka tendangtsü maparen meinyakteti lir. Kasaji inyaktsü asoshi par linüki launch pad renemba den külemi, kilometer 5000 shi talang firing range-a renemtsü nungdaker. Ajisüaka, par linüki totsü aser missile kadoktsü asoshi nungdakba timer den sentakba technical terenemtsüren merenemteti lir,” ta pai ashi.
US densema alimai par linük anema benokba tongpang nung amshitsü missile aser nuclear osettsüset meyanglutsü tenokdangbaren anemer ta sayutsü nükjidong nung aser Kim indang tashi sayutsü asoshi Pyongyang-i par missile aser nuclear oset tasen tendangtsü osang ka tawa amokmerena metetdakja lir.