US-i agütsüba senotsüji Pak-i kiralongra atema amshir

New Delhi, September 23 (Agencies): US House sub-committee on terrorism Chairman, Ted Poe-i, Pakistan ya alima nung kiralongra adokdaktsüba linük ka lir, anungji America-i Islamabad den tesentaktep ayuba reprangshitsüla, ta ashi.
“Pakistan ya kiralongraba linük ka lir, aser iba linük ya tamang katettsüsa masüba partner ka asübayong ni iba bill (Pakistan kiralongrar linük ta sangdongtsü atema) ya benoker,” ta Ted Poe-i ashi.
“Tang Congress nung kwikati iba bill nungitdir repranga atadi,” ta Poe-i ashi.
Pakistan-i alima kiralongra nung aibelenba kuli aika liaka kechiba United States-i parnok nem maneni military aser military masüba teyari agütsür, ta asüngdangba langzüdang Poe-i, “Tangbo Pakistan anema kuli jenti lir. Kuliji Pakistan-i anatsülen shilem agir,” ta ashi.
“Parnoki United States dang nungi senotsü agir aser item senji karbo ISI (Inter-Services Intelligence) keti aor, iba sülen senji alima kiralongra atema amshir,” ta paisa ashi.
Pakistan ji “Ivy League of Terrorism” ta ashitsü temsüa lir asü, ta asüngdangba langzüdang pai, “Au, tang Pakistan jenjang apibo yamaji ashitsü temsüa lir,” ta ashi.
Kiralongrartemi Uri amakba atema India-i mangyangtsüla asü, ta asüngdangba langzüa pai, “India sorkari kechi inyaktsüla, iba atema ni ashitsü makok saka parnoki kechi inyakner iba lemtettsüji parnok dak temeten lir,” ta ashi.
Tawa Ted Poe den kasa Congress züngsem, Dana Rohrabacher nati Pakistan ya kiralongrar linük ka ta sangdongtsü atema bill ka benokogo.