US-i amakba mapang aibelena Afghan sepai 14 tepset

Pul-e Alam, July 20 (Agencies): Hombar anepdang züngia Kabul south tsütsü Taliban telungpur aliba tesem nung US-i tayimtsü nungi amakdang tajemba agi Afghan sepai 14 süogo, ta ketdangsertemi ashi.

“Tanep 6:00 ako nung US helicopter anati Logar Province kübok Baraki Barak district nung army check point ka amak,” ta district governor Mohammad Rahim Amin-i ashi.

“Iba checkpoint nungji mi adok aser Afghan sepai 14 asü,” ta paisa ashi.

America nunger military ketdangser kati, “tanep Logar Province nung US sepai densema aliba tatalokba indang ni-a angashia liasü,” ta ashi.

Logar Province governor indang otongdar Din Mohammad Darwesh-a iba osangji tejangja aser sepai 14 asübaji tejangja, ta metetdaktsüogo.

Amin-i ashiba agi, amakba checkpoint ji melung malemtsü (telungpur aliba) tesem ka masü.

“Americe nungeri amakba mapang nungji Baraki Barak nung aliba checkpoint nungji Afghan wako ayipshia liasü,” ta pai ashi.

Küm 13 Afghan rara mapang anüng nungi amakdang nübur jenti asüba ya tebilemtsü onük tongtibang ka lir.

Yaküm December ita nunga Nato air strike mapang Baraki Barak nung nübur pongu tepset aser trok yirua liasü.