US-i aniba alima teloktep mitkartemi IS madak takok angur: Obama

Washington, April 14 (Agencies): US-i aniba alima teloktep mitkartemi Islamic State (IS) ta ajaba kiralongrar telok madak takok angutsü tenzükba osang ka US Tir, Barack Obama-i tanü, Brehostibar nü sangoktsüogo.
“Syria aser Iraq naprong nung IS teloki tamakok angutsü tenzükogo. Arab linüktem densema, ozü US-i aniba alima linük 66 nungi teloktep mitkartemi IS anema maneni raratsü nangzüker,” ta pai ashi.
Alima teloktep mitkartemi tanü tashi nung IS telok 11,500 ben tashi amakba sülen Sunni kini tentetba IS telok indang lenir aser züngsem meyirijang aika tepsetba osang bushiteta aliba olen pai metetdaktsü.
“Syria aser Iraq na nung IS tashi kanga ajema akümba osang bushitetogo. Par züngsemtema küm 2 tsüngda nung tang tajemtiba akümba osang bushiteta lir aser parnok aikati amajok nung tongpang rarar ta tangatetba ayutsü tenzükogo,” ta Obama-i shisem.
US sorkari tentetba Central Intelligence Agency (CIA) tesepti, Virginia kübok Langley nung par national security lenirtem den ajurutepa sensak asemba sülen osangbener den ajurutepdang Obama-i tanü iba olenji sangoktsü.
IS telok indang chemical tongpang oset yanglutsü mapatong lenisang, Abu Dawud apuba aser Iraq nung tentetba IS telok nem senotsü agüja yarir, Abu Salah tepsetba densema, IS teloki ita ishika tejaklen nungi tenzüka, tamakok tulu ajuruba osang bushiteta lir.
“Tarutsü anogotem nunga alima teloktep mitkartemi IS anema tesashiba raratsü renema lir,” ta Obama-i nenshia ashi.
US-i aniba alima teloktep mitkartemi yarisema, Iraq mitkartemia IS ket nungi Ramadi tanaben agiogo aser Euphrates River moapua tanaben agishitsü mapatong tenzüka lir.
Syria mitkartemia IS telok al-Shadadi nungi makdokba ajanga Raqqa aser Mosul na nung tentetba IS teloktem indang osettsüset abentsü lenmang shibangtsüba osang bushitetogo.