US-i aniba alima teloktep teloki IS den tesashiba raratsü azüngashir

(Abelen nungi achijileni tarensena) Australia, Germany, France, US, Britain aser Netherlands nungi Defense Minister-temi Paris yimti kübok France Defense Ministry kilung nung arok noksa agitsü asoshi külemi nokdaka ataba noksa ka yangi angur. (Paris, January 21)

Paris, January 21 (Agencies): United States-i aniba alima teloktep teloki Islamic State (IS) kiralongrar telok den taoba mapang nungi tesashiba raratsü asoshi Paris yimti nung yashi, Bodbar nü azüngashiogo.

Yashi senden amenertemi IS den tesashiba raratsü azüngashiba den külemi, IS anemba alima linük 26 dak temai Belgium yimtiba, Brussels nung taruba February ita senden amentsü ayongogo.

Yashi senden nung France, Australia, Germany, Italy, Netherlands, Britain aser US nungi defense minister-temi shilem agia liasü.

Yashi senden nung shilem agirtemi Iraq aser Syria sorkar na maneni nungita yaritsü aser IS ket nungi Mosul aser Raqqa na densemba tongti yimti ana tanaben agitsü alizüng ayuba osanga metetdaktsüogo.

“Mitkar tashi amshiba den külemi, rongsenren tenokdangba sentongtem amala tanga tasa balala amshia raraba ajanga IS telok samatsütettsü,” ta U.S. Defense Secretary, Ash Carter-i yashi senden nung metetdaktsü.

“IS anema raraba tongpang nung alima linük ajungai, talisa Arab aser Asia na nung tentetba linüktemi tongti shilem agitsüla,” ta shia, Carter-i hopta 3 shi lir külen Brussels yimti nung senden amentsü ayongzükba olen ka sangoktsü.

Alima teloktep mitkartemi tayimtsü amshia raraba ajanga IS teloki tamakok tulu ajurua par telok tashi taoba mapang nungi tang tajemba akümba olen ka France Defense Minister, Jean-Yves Le Drian-ia metetdaktsü.

“Iraq aser Syria na nung IS anema raraba teloktem nungita yariba ajanga alimai IS telok meshimeshia samatsütettsü,” ta pai shisem.