US-i aniba teloki anüng nungi Syrian army alidak tesem amakba aitsür

Damascus, December 07 (Agencies): US-i aniba teloki anüng nungi amakba mapang Deir al-Zour province, Syria nung army aliba tesem amakba atema Syria foreign ministry-i Hombarnü aitsüogo.

“US-i aniba telok ya kiralongrar den kanga zübazüba rarar aser parnok dak tezüngkang shisatsü ka mali,” ta ministry sangdong ka ajanga ashi.

Kasa sangdong ajanga, US-i aniba parnok telok pezüi Deobar nü Deir al-Zour nung aliba military tesepti ka nung missile toku (9) kahloktsüdang sepai asem asü aser 13 yiru, ta ashiba Xinhua news agency ajanga metetdaktsü.

Iba amakba mapang ‘armoured vehicle’ asem, sepaitem belenba gari pezü aser machine gun ishika ta anüka raksatsü.

Ministry-i, international teloki iba amakba aitsütsüla aser tarutsü mapangtem nung ibala mesükba matalokdaktsütsüla kechiba süra iba tatalokba ya ama UN Charter anema lir, ta ashi.

Syria nung US-i aniba telok-i anüng nungi amakba mapa tenzüker küm ka tsüngda nung military tesep amakba ya tan mezüng lir.