US-i anir Syria amakba sülen India-i atsüanem alitsü ayongzüker

New Delhi, Rongchii (April) 14 (Agencies): United States aser parnok den yaritepertemi Syria amakba anogo nung India-i telok anaprong dang atsüanem alitsü aser olemtep ajanga angatetteptsü tayongzükba ka agütsüogo.
Assad’er sorkari civilian tem dak chemical amshia amakba atema tanü US, United Kingdom aser France linüktemi Syria sorkar meyong tongtipang kiojentem amak.
“Telok ajak dang atsüanem alitsü aser tensa tamajungba mekümdaktsütsü atema onoki ayongzüker. Iba onük ya olemtep ajanga angatetteptsüla. UN Charter aser international law nung ajemdaker mepetmesü angatetteptsüla” ta External Affairs Ministry otongdar Raveesh Kumar-i ashi.
Tanü linük asemi missile 100 dak tema khaloktsü. Taoba hopta Syrian sepaitemi Douma jila nung miim mozü amshia amakdang nisung aika asü aser ibaji mangyanga tanü parnoki Syria sorkar meyong tongtipang kiojentem dak tenük yoka amak.
“Chemical weapons amshibaji shitak süra, iba mapaji tesempatsüka lir. Kuli tejangja bushitsü atema onoki OPCW (Organisation For The Prohibition of Chemical Weapons) nem bushisüngdang südaktsütsü akhanger” ta Raveesh Kumar-isa ashi.
United Nations asoshi chemical weapons ken o tem bushisüngdangba telok OPCW-i Douma nung chemical weapons amshiba indang ken o bushisüngdangtsü ta metetdaktsüogo.
Iba lendong nung nisung 70 shi ka taküm sama ta osang angazüker.
Syria aser Russia nati tanü tayimtsü amshia amakba inyakyim aitsüogo aser Bashar Assad’er sorkari chemical weapons mamshi ta parnokisa metetdaktsü.