US-i aoba Air India tayimtsü nung kaketshir 19 noktang

Hyderabad, Dec. 21 (Agencies): Deobar aonung Air India-i kaketshir 19 tashi San Francisco aotsü lia noktang. Kaketshirtem admission agitsü aliba university anaji US sorkari tang bushisüngdang tesüdak lir aser iba yongji kaketshirtem moudaktsü, ta Air India-i tanü ashi.
Air India-i sangdong ka nung ashiba agi, December 19, 2015 nü US Customs and Border Protection Agency ajanga parnoki dangi sangdong ka nung university anaji tang bushisüngdang tesüdak lir aser San Francisco-i aruba kaketshirtemji US-i maitdaktsüi India-i meyipa yoktsü ta ashi.
Iba nungji ajemdaker Air India-i Rajiv Gandhi International Airport nung inyakba staff dang Deobar aonung kaketshir 19 tayimtsü nung manikettsü atema tetuyuba agütsü.
“Tesüiba mapang nunga, kaketshirtem item rejutem nung admission agitsü atema tonga aoba sülen India-i meyipa yokogo. Parnok maaksü majurudaktsütsü aser parnok senotsü meindokdaktsütsü atema onoki parnok tayimtsü nung memendaktsü” ta Hombarnü AI ketdangser kati ashi.
Air India-i parnok indang ticket sen ajak meyipa agütsütsü sentong lir. Tang tashi nung Air India tayimtsü ajanga San Francisco-i aoer kaketshir 14 tashi India-i meyipa yokogo” ta paisa ashi.
Kaketshirtem one-way ticket amer US-i aoer aser parnok India-i meyipa arutsüsa tensa ajurura, ticket alidang sen aika endoker aser India-i meyipa arutsü atema tayimtsütem nunga menden mangur, ta ketdangserisa ashi.
Ano külen, university ana rongnung katibo parnok indang website nung, media osang kar ajanga onok indang website US sorkari noktanga lir ta olulu prokshir, ta shia lir.
Hyderabad nung aliba US consulate nung ketdangsertemi iba dak sendakba osang tejangja metettsü atema bushitepdar.