US-i arrtsülen atsü atema tax agiba anentsüla:Mexico

Mexico City, February 25 (Agencies) : US aser Mexico na arrtsülen atsü atsütsü atema US-i Mexico indang import tem nungi tax agiba anentsüla ta Mexico-i ashi.
Foreign minister Luis Videgaray-i, Mexico-i oset ajanga telangzüba agütsütettsü—US-i yokba osettem nung sen jenjang balaka atakteta yutsütsü, ta ashi.
“Onoki yamaji inyaktettsü aser ibaji inyaktsü atema kecha tebilemdangtsü mesüra tarendaktsü mali. Onok teben paiteper tangbo makazütsü. Ibai onoki shishia agitsü,” ta pai shisem.
Osang ajanga ashiba agi, foreign minister-i Texas, Iowa aser Wisconsin state tem dena tanga state kar nung sen jenjang melenshitettsü ta jangjateta lir.
Texas-i aitba oset timba ka Mexico nungi lir. 2015 küm Mexico nungi Texas-i sen dollar million 115 alanga oset aita liasü, ta US Department of Commerce sangdong ka ajanga metetdaktsü.
US Tir Donald Trump-i linük ana tsüngda atsüji lateta aliba mapang dang nungi tekaraba nung yanglutsü ta ashiba sülen Videgaray-i US kümdangtsü o ya jembi.
Hokolbarnü Maryland nung Conservative Political Action Congress sentong nung o jembiba mapang Trump-i America lisopur ajak nung tama asütsü nangzük aser arrtsülen atsü tashi tait atsütsü ashi.
Trump-i arrtsülen atsü atsütsü atema Mexico-i sen agütsütsü ta aiben ashir. Iba atsü nungji sen dollar billion 21.5 nüngdaktsü, ta Homeland Security nung Department ka osang ajanga metetdaktsü. Trump-i sen dollar billion 12 ang nüngdaktsü ta shia liasü.
US Tir-i Mexico nungeri oset import asüba nungji noklang nung shilem 20 tax meshitsü aser ibaji atsü atsüba nung amshitsü ta benoka lir.
Brihostibarnü US Secretary of State Rex Tillerson aser Homeland Security Secretary John Kelly nati Mexico nungi Secretary of State aser Security Secretary na den ajurutepa senden amen, ajisüaka senden temer külen osangbenertem den jembiaba mapang parnok shingaia arrtsülen atsü atsütsü indang mashi.