US-i carbon dioxide tajemba adoktsütsü renemba mapatong pela agizüker: Hollande

Paris, August 04 (Agencies): United States linüki mim aketba carbon tango tajemba adoktsütsü asoshi telemtetba agibaji kanga pela agizükba olen ka France Tir, Francois Hollande-i tanü Mongolbar nü metetdaktsüogo.
Paris nung taküm küm tatembanglen amentsü ayongba Global Climate Conference nem tajangzük bener arutsütsü nükjidong nung US sorkari par linük adokba carbon mim tango tajemba kümdaktsütsü lemteter lir.
Iba tangatetba yur külen, US Tir, Barack Obama-i par US linük tentetba factory-temi adoktsüba carbon mim tango tajemba kümdaktsütsü asoshi renemba mapatong ka yashi Hombar nü alima dang metetdaktsüogo.
Alima nung tentetba factory den külemi, gari kanga bolua anishiba ajanga carbon dioxide mim tango kanga sashia adokdaktsür aser iba carbon dioxide tali akümba ajanga alima ajunga nung tsüngsang mupong ajunga balaka küma melenshitsüba kuli scientist aser tsüngsang mupong tendanger mongintemi bushiteta lir.
“Tir Obama aser pai aniba US sorkari par linük ajunga nung carbon dioxide ta ajaba greenhouse tango tajemba adoktsütsü mapatong tenzükba atema kanga pelar,” ta Hollande-i tanü osangbener den ajurutepdang metetdaktsü.
“Par linüki tang mapatong tajung tenzükba ajanga Paris yimti nung amentsü ayongba alima ajunga nung tsüngsang mupong balaka akümba den sentakba senden takokba nung amentsü tamang akar,” ta pai ashi.
Osettsüset balala yangluba factory kiburtemi pei factory nungi adokba carbon dioxide tango noklang nung shilem 32 agi 2030 küm tashi nung tajemba kümdaktsütsü tetuyuba Obama-i agütsüba osang jangjaogo.