US-i chemical weapons dak sendakba nung Iran aitsüba nung lendong keta lir: Foreign Minister

Tehran, Yimpoksüi/Nobember 24 (Agencies): US-i, Iran ket nung chemical weapons programme ka lir ta aitsüba dak lendong keta lir, ta Iran Foreign Minister Mohammad Javad Zarif-i ashi.
Taküm küm tetenzüklen Tehran aser linük tashitait-tem tsüngda 2015 küm nuclear deal yangluba nungi atsünginba sülen tang US-i Iran aitsütsü meranger.
Paisa, linük kobai Iran anema CW (chemical weapons) amshitsü asoshi Iraq nem teyari agütsü aser iba sülen item CW tem agintsü aoshi Iraq amaka, parnoki weapons of mass destruction dak sendakba nung aitsüba dak lendong keta lir, ta ashi.
Rogonü Iran foreign ministry-i ashiba agi, Tehran-i iba taitsüba anemer.
“Tamendakdak makai aitsüba ya United States atema yimyasüpaba ka kümogo aser onoki iba inyakyimya aitsür,” ta foreign ministry-i sangdong ka ajanga metetdaktsü.
“Iba amala teyazü taitsüba ya parnok tenangzükba raksaba alima tsüngdang meimbanga, Iran dak ranglokdaktsütsü asoshi inyakba lir,” ta kasa sangdong ajanga ashi.
Kasa mapang nung, member state rongnung chemical weapons arsenal meraksar rongnung US ya ka lir ta shia Iran-i aitsüogo.