US-i China dak temulung malemer

Washington, Luroi/August 17 (Agencies): Pacific nung US aser tembartem dak amaktsü nükjidong nung China mitkar training agir südi, ta Pentagon-i tekümdangtsü osang ka metetdaktsü.
China-i bomber plane meta talangi yoktettsüsa tashi renloker, ta Congress nung annual report agütsüba nung shia lir.
China-i defence nung sen billion $190 shi indoka mitkartem tashi tuluba kümdaktsür, ta report nung shia lir.
Iba report dak ajemdaker China-i telangzüba kecha agüja mali.
“Taoba küm asem tsüngta People’s Liberation Army indang tzüma nung bomber tem amshitsü tesem kanga keraa renlokogo, iba ajanga region nung tzüyim sepaitem tangazükba tali nguteter aser US aser tembar linüktem dak tenük yoker amaktsü asoshi training agir südi,” ta report nung shia lir.
Iba amala tayimtsütem ajanga China-i kechi sayutsü meranger, ibaji mejangjateter, ta report nungsa shia lir.
PLA temi Guam densema western Pacific Ocean nung aliba US aser tembar linüktem indang mitkar tamendaktak tonga maktettsüsa tashi sayutsü, ta report nungsa shisema lir.
China-i rarar takok angutsü asoshi ali nung sepaitem asendenshiba mapang ka lir, ta parnokki ashi.
Taruba küm ter tsüngta China nunger military budget ya sen billion $240 tashi akümtsü südi, ta Pentagon-i asadangteta lir.