US-i Cuba anema benokba tenokdangba sentong agiener

Washington, September 18 (Agencies): United States (US)-i Cuba anema benokba rongsenren tenokdangba sentong agiena par linük tentetba shishilembartem nem Cuba den shishilembatsü temelaba tanü Hokolbar nü agütsüogo.

Par linük ana tsüngda küm 50 dak tema tesendaktep mejungi lir külen US o Cuba nati tanaben sendaktepshitsü tenzükba sülen tan tenokdangba sentong agienba ajanga par linük ana tsüngda tesendaktep junga akümba kuli angur.

Aji oda, par linük ana nüburtemi tetsükdakba kecha majurui senzüsenpongtsü, internet den sentakba mapatong balala inyaktsü, shishilembatsü, bank-tem sendaktepdaktsütsü aser US nung tentetba shishilembaba teloktemi Cuba nung par kongsang tentettsü temelaba tan agütsür lir.

“US o Cuba na tsüngda tesendaktep tajungba akümba ajanga linük anaprongla indang nüburtem nem rongsenren tajangzük tulu bener arutsütsü,” ta US Treasury Secretary, Jacob Lew-i tanü sangoktsü.

“Tan tenokdangba sentong agienba ajanga Cuba nüburtemi par linük nung terenlok lidaktsütsü den sentakba maparen sadema inyakdaktsütsü asoshi US-i lenmang sadema lapoktsür lir,” ta pai ashi.

US Tir, Barack Obama-i Cuba lenisang, Raul Castro den yaküm December ita tsüngdong ajurua par linük ana tsüngda tesendaktep tajungba küma yanglushitsü nangzüktepba sülen Obama-i taküm January ita sangoktsüba ama, par linüki küm 53 tejaklen Cuba anema benokba rongsenren tenokdangba sentong tan agiener lir.