US-i Europe nem teyari sen million 20 agütsüsemer

Washington, March 29 (Agencies): Europe-i ajurushia aliba migrant nisungtem den sentakba khuret den yariteptsü nükjidong nung United States sorkari Europe nem dollar sen million 20 agütsüsemtsü tenangzükba olen ka metetdaktsüogo.

“Europe tesem balala nung jenoka alir migrant nisungtem yaritsü maparen nung United Nations (UN) aser International Federation of Red Cross/Red Crescent Societies nunger yarisemtsü tangatetba nung ozü linüki maneni sen million 20 agüja yaritsü renemogo,” ta US State Department-i osang jangjashitsü.

Tan nangzükba densema, US-i yaküm o taküm na tsüngda nung migrant nisungtem yaritsü nükjidong nung teyari sen ajak agi dollar sen million 44 tashi agütsüba osang bushitetogo.

Tan agütsütsü nangzükba teyari sen million 20 nungi million 17.5 shi United Nations High Commissioner for Refugees (UNHCR)-i ketdang asüba Regional Refugee & Migrant Response Plan for Europe mapatong nung amshitsü sentong renema lir.

European Union (EU) aser Turkey nati Syria ajangdanga Greece tonga aoba migrant nisungtem Turkey linüki meyipa yoktsü tezüngzüktep agir hopta ka shi nung US-i tan teyari sen agütsüsemtsü osang ya metetdaktsür lir.

Greece nung pei tenüng züluoka Europe nung jenoka alitsü temeten angur migrant nisungtem Turkey-i meyipa yokba melena Turkey nung ozüng alema jenoker migrant nisungtem EU nung densemba linük balalai yoktsü tezüngzüktepji tan March ita tomlen agia liasü.

Iba tezüngzüktep agiba sülen EU-i Turkey nung jenoka alir Syria refugee nisung million 3 shi anepalutsü maparen nung yaritsü asoshi Turkey nem teyari sen dollar sen billion 6.7 tashi agütsütsü aser Turkey EU nung züngsemtsü maparena tekaratiba mapang nung inyaktsütsü nangzüktepa lir.