US-i Fallujah refugee nisungtem atema teyari sen million 20 agütsür

Washington, June 22 (Agencies): Iraq kübok Fallujah yimti toktsüba refugee nisungtem yaritsü nükjidong nung US-i United Nations (UN) nem teyari sen dollar sen million 20 agütsütsü renemba osang ka tanü, Bodbar nü metetdaktsüogo.
Islamic State (IS) kiralongrar teloki küm 2 tashi par tesepti ama amshidak, Fallujah yimti ya US mitkartemi nungita yariba Iraq mitkartemi taoba hopta IS ket nungi tanaben agishiba osang jangjaogo.
“Baghdad yimtiba anülulen tsütsülen tentetba Fallujah yimti toktsür refugee nisung 85,000 shi tebang agi mejembitetba timtem toushi ajuruba den külemi, parnoki tang rongdaka teyari nungdaka lir,” ta shia, UN kübok tentetba Central Emergency Refief Fund-i Fallujah refugee nisungtem yaritsü atema par senpong nungi dollar sen million 17.5 tan Hombar nü agüja liasü.
2014 küm nungi tenzüka Iraq mitkar aser IS telok na tsüngda tongpang raraba ajanga bener arutsüba lendong nungi taküm kümzüktsü nüjidong nung Iraq nübur million 3.3 dak temai pei talidak toktsür tesem balala nung jenoka aliba osang ka UN-isa metetdaktsü.
Fallujah toktsüba refugee nisungtemi chiyongtsü, mozü mora aser jenokdak tang rongdaka nungdakba osang ka U.N. High Commissioner for Refugees-ia metetdaktsüogo.
Ano külen, Iraq mitkartemi Fallujah tanaben agishitsü tongpang ita ka shi raradang IS züngsem 2,500 shi tepsetba osang ka Iraq mitkar commander, Lt. General Adbul-Wahab al-Saadi-i metetdakja liasü.