US-i India aser Pakistan sepaitem tsüngda maneni tongteprateptsü ayongzüker

Washington, October 5 (Agencies) : Tensa süngjema akümtsü aser shisabulu malitsü atema US-i India o Pakistan sepaitem tsüngda teti tongtepratep asütsü tayongzükba agütsü.
America ketdangsertemi linük anaprong nungi ketdangsertem den osangtsüsang agitepdar, ta Pentagon press secretary, Peter Cook-i ashi.
“India aser Pakistan sepaitem tsüngda tongtepratep südar ta onoki meteta lir aser maneni tongteprateptsü ayongzüker. Iba jagi tensa tajungba akümtsü” ta Peter Cook-isa shisem.
Kiralongrartemi Uri amakba sülen kidangsüa aliba linük ana tsüngda mangatettep adoka aliba atema osangbenertemi asüngdangdang Pentagon press secretary-i iba osang metetdaktsü.
US defense secretary Ashton Carter aser US sorkari Pakistan o India tsüngda mepetmesü aliba agientsü imlar aser khurettem koktettsü atema teti tongteprateptsü ayongzüker, ta paisa shisem.