US-i India dang J&K nung tenokdangbatem agientsü mepishir

New York/New Delhi, September 27 (Agencies): United States-i India dang tekaraba nung Kashmir nung tenokdangbatem agiendaktsüner ta mepishiogo, ta US ketdangser kati metetdaktsü.
Ketdangserisa, US Tir, Donald Trump-i India aser Pakistan na tsüngda mangatettep süngjemtsü atema tiyongtsüi aita inyaktsü melunga lir, ta metetdaktsü.
Tan hopta Trump-i Ato kilonser, Narendra Modi aser Pakistan Ato kilonser, Imran Khan naprong ajurua liasü. Modi aser Khan naprong UN General Assembly nung adentsü atema tang US nung lir.
Ketdangseri ashiba agi, Trump-i Ato kilonser, Modi den tesendaktep tajung yuogo ajisüaka Kashmir nung tenokdangbatem atema United States-i tebilemtsü akar.
New York nung osangbenertem den jembidang State Department official for South Asia, Alice Wells-i, “Onoki nenok nem yangji (Kashmir) tekaraba nung tenokdangbatem agiendaktsüner aser aser pua alirtem tekaraba nung chiokdaktsüner,” ta metetdaktsü.
August ita nung India sorkari Jammu & Kashmir nem maongka balaka agütsüba Arrla 370 agiena liasü. Iba mapang nungjagi tenzüka Kashmir nung yimtenren lenirtem aika pua ayu, phone aser internet service anentsüba den külemi tesem aika nung curfew ozüng benoka lir. Iba dak alia joko anogo 60 jungnüa Kashmir nung school tem junga melapoker.
Alice Wells-isa, United States-i Kashmir atema tebilemtsü akaba indang tongtibang sabang aika nung metetdaktsüogo, ta ashi.
“Yimtenren lenirtem aser bushiness lenirtem densema nisung aika pua aliba aser Jammu & Kashmi nung alirtem nem tenokdangba aika agüja aliba atema United States-i kanga tebilemtsü akar,” ta lai ashi.
“Onoki India sorkar nem tekaraba nung local lenirtem den yimten ken o jembidaktsüner aser akokba tashi tekaraba nung nangzükba ama election agidaktsüner,” ta lai ashi.
“Tensa süngjemba aser linük ana tsüngda ken o jembiba ajanga alima ajangzüktsü, aser linük anapronglai dang asüngdangra Tiri (Trump)-i ken o jembiba nung tiyongtsüi aita shilem aginer,” ta lai metetdaktsü.
Pakistan Ato kilonser, Imran Khan aitsüba olen ka nung Alice Wells-i, Kashmir onük nung Khan-i jembiba o jagi teyari mangutsü, ta ashi.
Laisa, kechiba Khan-i China indangbo mejembir, kechiyong China-ia Uighurs aser Turkic jembiba Muslim nunger million ka shi pua lir, ta ashi.
Iba dak sendakba nung lai, “Muslim nunger atema bilemtsür süra (Khan-i) anüdoklen China nung pua alirtem atema-a jembitsüla,” ta ashi.
China aser Pakistan na ya rongsenkettsüng tsütsü tongtibang partner ka lir.
Uighurs dak sendakba nung tasüngdangba ka langzüdang Khan-i, Pakistan aser China na tesendaktep tajung lir, anungji Pakistan-i China den kibok nungang jembitsü, ta ashi.
Hokolbar aonung 74buba United Nations General Assembly nung India Ato kilonser, Narendra Modi aser Pakistan Ato kilonser, Imran Khan napronglai jembitsü. Modi-i India-i alima onük balala atema inyakba indang jembitsü saka Pakistan indangbo mejembitsü, ano Khan-ibo Kashmir onük süoka jembitsü tebilemba lir. Osang angazükba agi, Modi-i UNGA senden nung jembiba sülen Khan jembidang pabo madentsü.