US-i India NSG züngsem akumtsü pusemer: US Tir Obama

Vientiane, September 08 (Agencies): Brihostibarnü Laos yimtiba, Vientiane nung East Asia Summit nung US-India jurila senden ka amendang US Tir, Barack Obama-i India Ato kilonser, Narendra Modi dang, India-i NSG züngsem akumtsü atema inyakba nung US-i akanga pusemer, ta metetdaktsü.
Iba senden nung civil nuclear aser alima tzümopung melenshiba onük densema linük ana külem onüktem nung taliba amalitepa inyaktsü atema o lemtepa liasü.
Tesülen Modi-i twitter ajanga, “India-US tesentaktep atema President of the US (POTUS) den olemtep kaogo,” ta metetdaktsü.
White House ketdangser katia, “United States aser India tsüngda tesentaktep akhangshir, Tiri, India-i Nuclear Suppliers Group (NSG) züngsem akumtsü atema inyakba nung US-i akanga nungiter ta shiogo,” ta metetdaktsü.
“Ato kilonser Modi-i India rongsenkettsüng nung temelenshi atema inyakba atema Tir Obama-i pa nem tenüngsang agütsü. US Tirisa, GST bill agizükba ajanga rongsenkettsüng nung temelenshi tulu alitsü imlar ta shiogo,” ta paisa ashi.
Ano külen Modi-ia Tir Obama-i linük ana tesentaktep atema inyakba aser linük ana tsüngda tamang katettsüsa inyakba atema tenüngsang agütsüogo.
Modi-isa Obama Tir menden nungi anisüngzükba sülen India semdangtsü jaok, aser Obama-ia iba maongkaji agitsü ta langzüogo.
Asayamenüa Obama-i, pa kinüngtsü Michelle tenati Taj Mahal semdangtsü sentsüh lir ta ashi. Yaküm Obama aser pa kinüngtsü nati India semdangba mapang Taj Mahal semdangtsü sentong liasü, ajisüaka Saudi Arabia Chuba, Abdullah ajungbena asüba ajanga Taj Mahal mesemdangteti Saudi Arabia-i ao.
Tesüiba küm ana tsüngda Modi aser Obama na senden tenetben mena liasü. 2014 küm September ita nung Modi-i Washington DC semdangba mapang tena tsüngda mezüngbuba senden White House nung amen. Tanü amenba senden ya Modi aser Obama na tsüngda linük ana lenir ama tatembangbuba senden asütsüa akok, kechiyong Obama sangküm January ita nung Tir menden nungi anisüngzüktsü.
Ano külen Brihostibarnü Ato kilonser, Narendra Modi-i, kiralongrabaji linük ka mapatong hadir ka amshir linüktem anema temerenshi tulu agütsütsüla, ta ashi.
Laos yimtiba, Vientiane nung 11buba East Asia Summit nung jembidang Ato kilonser, Modi-i, “Asenoki kiralongrartem kija anema masü saka parnok pusemer ajak anema inyaktsüla. Kiralongrabaji linük mapatong hadir ka ama amhsir linüktem anema asenoki temeresnhi tulu agütsütsüla,” ta ashi.
Paisa, “South Asia tesem nung linük aikati rongsenkettsüng lenmang atema yimjung lenmang bushir. Ajisüaka India nunger kidanger ka (Pakistan) lir, shirnoki tetoktepba balala atema kiralongrartem adokdaktsür aser kiralongrar,” ta ashi.