US-i India nunger tensa atema tebilemtsü akar

Washington/New Delhi, February 06 (Agencies): US-i tang India nung tamangba yimsü sadoka amangba/benshiba temeden dak sendakba tensa atema tebilemtsü akar, aser iba atemaji US ketdangsertemi India nunger ketdangsertem den-a jembiogo, ta State Department nungi ketdangser kati metetdaktsü.
Tang India linük tesem ajaklen Citizenship Amendment Act (CAA) anema longkak aitba mapang ka nung US-i iba osang ya metetdaktsür.
US ketdangserisa, pai India nung ketdangsertem ajurua tang linük nung tatalokbatem atema tebilemtsü kaa lemsatepogo, ta metetdaktsü.
Bodhbarnü osangbenertem den jembidang pai, tang India nung tatalokbatem atema onoki tebilemtsü akar. Ni India foreign minister ajurua jembiogo. Ni Indian ambassador-a ajurua jembiogo,” ta metetdaktsü.
US secretary of state, Mike Pompeo-i linük 27 indang International Religious Freedom Alliance tenzükba mapang nung osangbenertem den jembidang US ketdangseri, US-isa yaritsü melunga aliba aser item tebilemtsü onük kar bentettsü atema inyaktsü melunga aliba lemsatepogo, ta metetdaktsü.
India linük temzüng ajanga minority densema senso ajak nem kasa fundamental temedentem agütsür, ta Ministry of external affairs ketdangser kati metetdaktsü. Ajisüaka Citizenship Amendment Act (CAA) ajanga Muslim nungerbo sendoker, kechiyong reshikangshia kuli ajanga 2014 küm December 31 tashi nung Pakistan, Bangladesh aser Afghanistan linüktem nungi aruba Hindu, Sikh, Buddhist, Jain, Parsi aser Khristantem nem India senso agütsütsü saka iba nungji Muslim nungerbo maden.