US-i Iran aser Russia na nem lendong bener arutsür: Ayatollah

Tehran, November 24 (Agencies): US-i Middle East nung par mapatong balala inyakba ajanga Iran aser Russia na nem lendong bener arutsür ta bilemba olen ka Iran’er Supreme Leader, Ayatollah Ali Khamenei-i yashi Hombar nü metetdaktsüogo.

Russia Tir, Vladimir Putin den yashi Tehran yimtiba nung ajurutepa senden ka amendang Ayatollah-i iba olen ya metetdaktsü.

Syria Tir, Bashar al-Assad-i aniba Syria sorkar aser sorkar anemer na tsüngda mangatettep ken o adoka tongpang kanga sashia rarabarenji tanübo alima tashi abenba linüktem rong nung tongpang rarar ama kümogo.

Russia aser Iran nati Assad pusemer saka Turkey, Gulf Arab yimlitem aser West linüktemi Assad Syria yimsüsütsü menden nungi anentsütsü alizüng yua lir.

“US-i Syria amokbangba ayuba sülen tanüngba Middle East ajunga amokbanga ayutsü alizüng yua lir aser iba jagi Iran aser Russia na nem lendong bener arutsütsü akok,” ta Ayatollah-i metetdaktsü.

Alima tashi abenba linüktemi par mulungka agi Syria nung yimtenren temelenshi bener marudaktsütsü telemtetba ka Putin aser Ayatollah nati yashi senden nung agiba osanga jangaogo.

Ano, par linük ana tsüngda rongsenren tesendaktepa taoba mapang nungi tajungba kümdaktsütsü asoshi lenir anati alizüng ayutsü lemtet.

Taoba mapang, 2007 sülen tan mezüngsüa Iran semdangsang, Putin-ia Muslim nunger temeshi kaket, Koran ka Ayatollah nem yashi sempet agüja liasü.

Iran dang technology aser nuclear osettsüset mayoktsü asoshi Russia-i taoba mapang benokba tenokdangba maparen agienba osang ka Putin-ia yashi metetetdaktsüogo.