US-i Iraq den yariteptsü nangzüker: Ashton Carter

US Secretary of Defence, Ashton Carter-i Baghdad tonga aoba sülen U.S. mitkar lenir, General McFarland den ajurutepdang agiba noksa yangi angur. (Baghdad, April 18)

 Baghdad, April 18 (Agencies): US Defence Secretary, Ashton Carter-i Iraq tanü, Hombar nü semdangba osang jangjaogo.

Carter-i Baghdad yimtiba tong aoba sülen Iraq Ato Kilonser, Hadier al-Abadi aser Defence Minister, Khaled al-Obaidi na den ajurutepa senden amenba osanga jangjaogo.

Carter-i Iraq lenirtem den ajurutepdang, par US mitkar tali yoksemtsü densema, US sorkari Iraq den maneni yariteptsü renemba olen ka metetdakja liasü.

Ano, US-i aniba alima teloktep mitkartemi yaria, Iraq mitkartemi Islamic State (IS) ta ajaba kiralongrar telok nungi Iraq lushi tuluba ka tanaben agishitsü tenzükba onüka Carter-i Iraq lenirtem den benoka jembia liasü.

US mitkartemi sayutetba Iraq mitkartemi US-i aniba teloktep mitkartem nungi teyari agia, Hit region tuluba tanaben agishiba sülen Iraq anüdoklentiptsütsülen, Euphrates moapu tonga aoba osang bushiteta lir.

Iraq sorkari taoba March ita 24 nü nungi tenzüka par yimti tulutiba tarensen nung tanabuba, Mosul IS ket nungi tanaben agishitsü mapatong tenzüka lir.

Par sorkar mitkartemi Iraq anülulentip tsütsülen tentetba Ramadi yimtia yaküm, 2015 küm December ita agiba osang jangjaogo.

US mitkartem Iraq-i timba yokshitsü maparen tenzüktsü sentong renemba mapang ka nung Carter-i tan Iraq semdanger lir.

Carter-i tan Iraq semdangba ya pai US Defence Secretary menden benokba sülen tan agi Iraq tasembenbuba semdanger lir.