US-i IS telok meshimeshia samatsütsü nangzüker: Obama

US Tir, Barack Obama (Tiyongtsü)-i Washington kübok White House kilung nung osangbener den ajurutepa par US-i Islamic State telok meshimeshia samatsütsü nangzükba olen ka metetdaktsüdang agiba noksa ka yangi angur. (Washington, February 27)

Washington, February 27 (Agencies): US linüki alima ajunga nung kiralongrar telok tetsüti, Islamic State (IS) meshimeshia samatsütsü nangzükba olen ka US Tir, Barack Obama-i tanü, Honibar nü metetdaktsüogo.
“IS telok meshimeshia samatsütsü maparen kanga tasak aliba den külemi, par teloki lendong tesashitiba atalokdaktsüdak, Syria aser Iraq na den sentakba tensa kanga tebenja lir saka ozü US linüki IS telok meshimeshia samaja alima tensa tajungba kümdaktsütsü alizüng yua lir,” ta Obama-i sangoktsü.
Obama-i par mitkar züngsemtem Syria-i yoka idakji Kurd kin nisungtemi tentetba Syrian Democratic Forces telok den yaritepa IS telok anema raradaktsütsü tenzüka lir.
“IS teloki nübur jenti aliba jila aser yimtitem nung par tesep tenteta tai maketba nisungtem par jung kümdaktsütsü tenzüka lir. Ajisüaka, alima teloktep linüktemi par telok madak takok angutsü tenzükogo,” ta Obama-i metetdaktsü.
Arab linüktem densema, US-i aniba alima linük 66 densemba teloktep mitkartemi IS anema takok ngua raratsü tenzükba den külemi, tanüngba alima linüktemia teloktep mitkartem asemtsü tenzükogo.
“Iraq nung IS teloki tashiyim agi agiba ali lushi noklang nung shilem 40 tashi par ket nungi tanaben agiogo. Syria nunga teloktep mitkartemi par tesepti, Raqqa agiba den külemi, par totzü tutetdak poksatsüba ajanga IS teloki par züngsemtem nem ita sena ajema agütsütsü tenzükogo,” ta Obama-i sangoktsü.
Alima linüktemi aroki lungjemer nokdangba ajanga bendangertemia IS telok nung züngsemtsü mekokteti akümba osang bushiteta lir.
“Syria nung adokba mangatettepbaren agiena par nübur o nübur na tsüngda tongpang rarabaren anentsüba ajanga dang IS telok ya meshimeshia samatsütettsü,” ta Obama-isa metetdaktsüogo.