US-i jet tayimtsü 12 Turkey nungi aniteter

Berlin, December 17 (Agencies): US-i par mitkar fighter jet 12 tashi Turkey nungi aniteta Britain nung tentetba mitkar tesep nung yutsütsü lemtetba osang ka mitkar lenirtemi metetdaktsüogo.

Syria nung tesep tentetba Islamic State (IS) kiralongrar anema raradaktsütsü nükjidong nung US-i par F-15E Strike Eagles mitkar tayimtsü 6 tashi Turkey-i taoba November ita yokba den külemi, F-15C Eagles, air-to-air interceptors tayimtsü 6 Turkey nung tentetba Incirlik Air Base-i yoka liasü.

US Defense Secretary, Ash Carter-i Incirlik Air Base semdanger anogo ana shi lir külen, Germany nung tentetba US European Command-i par mitkar tayimtsü 12 Turkey nungi anitettsü lemtetba osang ya tanü sangoktsür lir.

“Ozü mitkar tayimtsütemji mapang tatsüka atema Turkey-i yoka liasü,” ta shia, tan mitkar tayimtsütem anitetadokbaji par US-i Turkey nung tenzükba IS anema raraba maparen anener masü ta Pentagon otongdar, Jeff Davis-ia metetdaktsüogo.

US-i tanga Incirlik mitkar tesep nung A-10 close-air support tayimtsü 12 den külemi, drone tayimtsü aser totzü abenba tayimtsütem yuja lir.