US-i missile defence ka takok ngua tendangogo

Washington, May 31 (Agencies): North Korea-i amakdang US linük kümzüka alitsü atema yangluba missile defence ka US mitkartemi Pacific Ocean nung takok ngua tendangogo.
Küm eshika tejaklen nungi shisabulua bilemba maparen ka nung takok ngutetogo, ta iba missile-defence system yangluba nung tanishir, Vice Admiral Jim Syring-i ashi.
“Asen lima kümzüka ayutsü asoshi iba missile defence ya kanga tongtibang lir, aser iba oset takok ngua tendangtetba ajanga lendong chichiba nungi kümzüka litettsü,” ta Syring-i iba missile tendangba osang sangdongba mapang shisem.
Iba mapa takok nguaka sen million $244 indoka yangluba missile-defence sentong ajanga North Korea nungi raraba mapang khaloktsüba intercontinental-range missile ya khazüka yoktsü akoktsü indangbo osang tejangja kecha mashi.
Tanga linük nem mepuzükdaktsüi khaloktsütsü atema Pyongyang-i missile yanglutettsü mapang talangka mali, ta osang angashir.
Tangari khaloktsüba missile anüng nung lia poksatsütsü asoshi 2014, June ita nung US-i yanglutet saka iba maparen teku tendangba nung pezü dang takok ngua tendangteta lir.
“Iba missile ya Pyongyang ajanga agütsüba tebilemtsü kisüng atema masü saka tarutsü anogotem atema lir, aser iba missile yangluba sentong nung North Korea ya kuli ka lir,” ta Pentagon odongtar, Navy Captain Jeff Davis-i ashi.
US mitkartemi tebilemtsü agütsüba ajanga nuclear aser missile sentong ya tenzük, ta North Korea-i ashir.
Mongulbarnü US indang Missile Defence Agencya ajanga tendangba ‘interceptor rocket’ ya California nung aliba Vandenberg Air Force Base ali telung nungi khaloktsü. Iba ‘interceptor rocket’ ya Pacific nung aliba Kwajalein Atoll nung missile tendangba tesem nungi khaloktsüba intercontinental-range missile poksatsütsü nükjidong liasü.