US-i Myanmar nem teyari agütsütsü nangzüker: Kerry

Yangon, August 05 (Agencies): United States-i tzümetsüng lendong ajurushia aliba Myanmar nüburtem yaritsü nükjidong nung nungdakba teyari agütsütsü tenangzükba olen ka US Secretary of State, John Kerry-i tanü Bodbar nü metetdaktsüogo.

Alima ajungai par linük nem nungdakba teyari agütsütsü temepishiba olen ka Myanmar sorkari tan Hombar nütu metetdakja liasü.

Tang lendong ajurushia alirtemi osettsüset nungdakba osang jangjatsü asoshi Yangon nung tentetba US embassy ketdangsertemi nungdakba maparen inyaktsü tenzüka lir ta Kerry-i ashi.

“Tan lendong ajurushia alir taküm jenjang tajungba kümdaktsütsü nükjidong ozü US-i nungdakba teyari agütsütsü renema lir,” ta Kerry-i ashi.

Mei tzünglu kanga sashia aruba ajanga taoba hopta nungi tenzüka Myanmar tesem aika nung tzümetsüng lendong kanga sashia ataloktsü tenzüka lir.

“Tan atalokba tzümetsüng lendong nung nisung 69 tashi asüba osang tanü tashi nung jangjaogo. Ano, nisung 250,000 dak temai timtem toushi jenti ajurutsü tenzüka lir,” ta Myanmar’er Social Welfare, Relief & Resettlement ministry-i tanü metetdaktsü.

Relief ketdangsertemi lendong atalokdak aikati tonga moteti aliba yong Myanmar southwest tsütsü Ayeyarwady delta region nung alirtemi tali kümdangshitsü osang ka Myanmar sorkari metetdakja lir.

Ano külen, rescue ketdangsertemi Ayeyarwady region nung alir tantsür tambur, tetsür aser tila tanurtem tekongleni anir oa parnok taküm kümzüktsü maparen tenzükba osanga jangjaogo.

Tan tzümetsüng lendong atalokdak ya Myanmar nung tsük timba adokba tesem asüba yong Myanmar nung alirtemi tarutsü mapang nung jang monguteti timtem tulu ajurutsü akok ta United Nations-ia metetdaktsüogo.

Japan-ia par Japan International Cooperation Agency (JICA) ajanga tabentsü sü, yipden sü aser plastic sheets agütsü nangzükogo.