US-i Myanmar nung shishilembatsü ajungshir: Suu Kyi

US yimtiba, Washington northwest tsütsü tentetba Roosevelt Senior High School nung (Abelen nungi achijileni tarensena) Elsi Argueta, Cindy Mayen aser Michannie Grant nunger densemba class 12 kaketshirtemi Myanmar lenila, Aung San Suu Kyi den selfie ka agiba noksa ka yangi angur. (Washington, September 16)

Washington, September 16 (Agencies): US nung tentetba shishilembatsü teloktemi Myanmar linük nung shishilembatsü tajungshiba olen ka Myanmar lenila, Aung San Suu Kyi-i yashi, Brehostibar nü metetdaktsüogo.
“Myanmar nung  rongsenren jenjang junga akümba ajanga democracy yimsüsütsü yimya benshitsüji tejakleni aotsü lenmang tajungtiba ta Myanmar nübur aser mitkar lenirtemi angatettsü,” ta shia, Suu Kyi-i yashi tajungshiba olenji metetdaktsü.
US-i Myanmar anema benokba tenokdangba sentongtem agiena Southeast Asia nung tentetba Myanmar linük den tetsükdakba kecha meli shishilembatsü lenmang sadema lapoktsütsü tenangzükba olen ka US Tir, Barack Obama-i sangoktsür anogo ka süir külen Suu Kyi-i US nung shishilembartem den ajururtepdang lai iba tajungshiba olenji lemsatepa liasü.
Yaküm, 2015 küm November ita agiba election nung takok ngua, Suu Kyi-i aniba National League for Democracy (NLD) yimtenren teloki Myanmar  sorkar tasenba tentetba sülen Suu Kyi-i tan mezüngsüa US semdangtsü tenzüka lir.
Myanmar linüki mitkar yimsüsütsüren toktsür democracy yimsüsütsü yimya benshitsü tenzüka aka, par yimtenren aser rongsenren sabang tuluba ka miktartem den sentaktepa lir aser US-i mitkartem den sentaktepa alir shishilembar aser shishilembatsü tentettem anema benokba tenokdangbabo tanü tashi magieni lir.
Ano külen, Myanmar nung temelenshi maneni agidaktsütsü atema US-i par linük anema benokba tenokdangba mapatong magientsü asoshi nübur temeten asoshi nokdaker tentettemi US sorkar ajungshia lir.
Taoba mapang Burma ta ajaba Myanmar linük nung nütsüng yongsük nisung million 50 dak tema lir aser par linük ya ali telung nungi tutetba rongsen jenti aliba linük ka lir.