US-i NSG züngsem linüktem dang India pusemtsü ayonger

Washington/New Delhi, June 17 (Agencies): United States (US)-i Nuclear Suppliers Group (NSG) züngsem ajak dang iba telok nung India linüka züngsemtsü atema mepishiogo.

Brihostibarnü osangbenertem senden ka nung jembidang state department otongdar, John Kirby-i, “United States-i Nuclear Suppliers Group (NSG) nung shilem agir sorkartem dang NSG plenary mapang India pusemtsü ajungshir, iba senden ya taruba hopta akatsüa akok,” ta ashi.

Tasüngdangba ka langzüdang pai, “Ibaji (senden) koma tembangtsüar memetet, ajisüaka parnoki (India) benokbaji onoki (US) pusemer ta onoki jangjatsüogo,” ta ashi.

Taoba hopta Ato kilonser, Narendra Modi-i US semdangba mapang US Tir, Barack Obama-i India NSG nung züngsemtsü atema pusemtsü, ta sangdonga liasü.

India linüka NSG nung züngsemtsü atema US-i nungita arudar.

Modi aser Obama na majurudang tamalen US secretary of state, John Kerry-i India pu-masemer NSG züngsem linüktem dang shidi ajanga, “India züngsemtsü atema menokdangtsü melungtsüla,” ta shia liasü.

Taoba hopta Modi aser Obama na senden amenba sülen külem sangdong ka ajanga, US-i NSG nung züngsemba sorkartem dang tan ita NSG Plenary alidang India-i benokbaji agizüktsü mepishir, ta metetdakja liasü.

Nuclear sector nung tongtibang onüktem NSG-i repranger aser iba telok nung adenba züngsem linüktemi nuclear technology shishilembatsü aser tanga linüktemnia yoktsü temeten angur.

China ketdangser osang ka ajanga, NSG nung India linük denra ibaji ajanga South Asia nung strategic balance anokshitsü aser India ji nuclear tashi aliba linük ka akumtsü, ta tashishiba olen ka sangdongba sülen US-i India pusemtsü sangdongogo.