US-i Nuclear ken o atema mapang agitetsüla: Iran

Tehran, July 12 (Agencies): Iran den nuclear ken o atema US-i mapang agitettsüla, aji mesüra Iran-i nuclear inyakyim ulushitsü renema lir, ta Deobar nü Iran nunger kaketshir meyong osang kaket ka ajanga Iran ketdangsertemi ashiba metetdaktsü.
“United States-i parnok sepaitem tashi amshia Iran amokmerentsü makok mesüra Tehran nung sanction ulushitsü makok, koba ajanga parnok nem olemtepba dak alia tanga tashi kecha magütsür,” ta Iran ‘Expediency Discernment Council’ nung secretary aser taoba mapang Iran ‘Revolution Guards Corps’ nung commander Mohsen Rezaei-i ashi.
Iran dak missile yanglutetba tashi aliba nung ajemdaker US-i nuclear ken o jembir külen Iran dang kilometre 300 tashi kahdoktetba missile ang yangluang, ta ashi. Yamaji süra tang Israel nungeri amokmerenba mapang ka nung Iran bo raraba oset tamshi ta ashir amai lir, ta Mohsen Rezaei-i ashi.
“Tarutsü nung US ketdangsertemi Iran den raraner, ta iba maparen yagi sayur…..parnoki aiblentsü aser arsang osang yoka o lemtet agitsü,” ta paisa ashi.
Iran nunger nuclear ken o jembirtemi, kanga shia ka, tasü ita aser nungpoka oteta US den iba ken o jembiba tushia ashiba mapang, US dang Iran Tir Hassan Rouhani menürema alidangsa iba nuclear ken o atema US-i mapang agitettsüla,” ta nenshia ashi.
US-i iba ken o nung tangatettep tajung kati marui onoki memulungba ang kar inyaktsü lemtettsüra Iran-i nuclear maparen tali ulushitsü renema lir, ta osang ka ajanga ashi.
UN nung teti asoshi züngsem P5+1 (China, France, Russia, the United Kingdom, aser United States, plus Germany) den 2013 küm nungi Iran-i iba nuclear ken o jembia arur. Aji oda süaka, Iran kümzüka ayutsü aser linük meyong nuclear sentong tembo iba ken o nung meinoktsüla kechiba süra ibaji Tehran asoshi lendong lir, ta Iran nung ketdangsertemi ashi.
U.S. Secretary of State John Kerry-i Austria yimtiba, Vienna nungi ashiba agi, Iran nuclear ken o nung ano tetsükdangtsü kar anendaka lir.
Iran o P5+1 na tsüngda June 30, July 7 aser July 9 anogotem nung iba ken o jembitsü thinena aruba sülen ano Deobar nü ajurutepa jemitsü sentong lir.