US-i ozüng alema tenokdangba sentong benoker: Iran

Tehran, January 18 (Agencies): US-i ozüng alema par Iran anema tenokdangba sentong benokba olen ka Iran-i kanga jashia tanü Hombar nü metetdaktsüogo.

“US sorkari tawa Iran anema benokba tongpang nung amshitsü ballistic missile mapatong nem tetsükdakba bener arutsütsü asoshi benokba tenokdangbaji ozüng alema inyaker lir,” ta shia, par linüki iba mapatongji tesashiba inyaktsü lemtetba osang ka Iran foreign ministry otongdar, Hossein Jaberi Ansari-i metetdaktsü.

US sorkari Iran dang ballistic missile yanglutsü osettsüset ayoker company 11 anema tenokdangba sentong yashi, Deobar nü benokba osang jangjaogo.

Iran-i yaküm, 2015 küm nangzüktepba ama, par nuclear mapatong anenba kuli tejangja bushitetba sülen US densema, alima tashi abenba linüktemi Iran anema taoba mapang benokba nuclear tenokdangba sentongtem taoba Honibar nü agienba sülen US sorkari tan Iran anema tenokdangba sentongji maneni benoker lir.

“Ozü Iran anema tenokdangba sentong benokba nem tapet telangzüba agüja, ozü missile tongpang osettsüset yanglutsü mapatong taoba mapang nungi tesahiba inyaktsü renema lir,” ta Ansari-i nenshia ashi.

Iran-i par ballistic missile yaküm October ita tendanga kadokba sülen par linüki par linük anema benokba tongpang nung amshitsü nuclear warhead bentetba missile yanglua metendangtsü tenokdangba anema inyaker ta shia, United Nations (UN)-i Iran aija liasü.

Ajisüaka, par linüki nuclear tongpang oset masü saka tongpang nung amshiba pokshitsü osettsüset dang par ballistic missile nung mesenloka tendang ta shia, Iran-i par missile tendangba maparenji metentsü.

“US-i kümshi dollar sen billion jenti jenjang aketba tongpang osettsüset Middle East nung tentetba linüktem dang ayoker aser item tongpang osettsüsetji amshia, Palestine, Lebanon aser Yemen nüburtem nem lendong bener arutsür. Anungji, par linüki ozü Iran indang missile tongpang osettsüset yanglutsü mapatong nokdangtsü temeten ngua mali,” ta Ansari-i shisem.