US-i Pak dang F-16 ayoktsü maparen tatembang kati arutsü

Islamabad, March 6 (Agencies): US sorkar-i Pakistan dang F-16 fighter jets ayoktsü indang maparen tatembang kati arua jembitsü telemtetba agiogo, ta Deobarnü osangbenretemi metetdaktsü.
“Iba tayimtsü ayoktsü mapa ya US foreign policy aser national security nükjidong nung keta aliba ama South Asia nung security terenlok tsütsü teyari agütsüba mapa ka mesüka lir,” ta US Federal Register-i metetdaktsüba osang ka nung shia lir.
“Pakistan-i kiralongrar den raratsü asoshi F-16 nüngdakba US ketdangsertem aser Congress züngsemtemi angateta aruba asoshi onoki kanga pelar,” ta Ambassador Jalil Abbas Jilani-i ashiba Dawn online ajanga metetdaktsü.
Federal Register-i metetdaktsüba osang nung iba mapa asoshi sen million dollar 700 shi nüngdaktsü ta shia lir.
Aji oda süaka India sorkar aser US nung yimsüsür karibo Washington telemtetba aitsüogo. Parnoki ashiba agi, item fighter jet tem jagi South Asia nung sepai tashi melenshitsütsü aser tatem nungbo India anema amshitsü akok.
Ajisüaka Federal Register-i iba mapa kechiba mulungtep ibaji rateta shiogo.
“Iba tayimtsü yoka teyari agütsüba ajanga South Asia nung sepai tashi memelenshitsü,” ta Federal Register-i ashi dang, iba tayimtsü ajanga tang aser tarutsü nung Pakistan security tebilemtsü ajema kümdaktsütsü, ta shisem.
F-16 tayimtsü talila akaba ajanga ammang danga mita aoba mapa inyaktettsü aser ibaji ajanga Pakistan nung kiralongra tebilemtsü nokdangtettsü, ta kasa sangdong nung shia lir.
Iba tayimtsü Pakistan dang ayokba ajanga yangji tayimtsü talila akümtsü anungji Pakistan Air Force tem ita shia nüngdakba training agiba den Block-52, F-16 aircraft anitsü asoshia training nüngdaktsü, ta Obama-i aniba sorkaria metetdaktsüogo.
Iba tayimtsü ayokba maparen nung US sorkar mapa tali madoktsü mesüra contractor-a shinga menüngdaktsü. Iba den külemi US defence nung kecha tetsükdaktsü malutsü, ta kasa osang ajanga ashi.
Iba mapa asoshi Congress nem anogo 30 nü mapang atakteta yutsüba March 11 nü tembangtsü aser iba sülen iba maparen tatembang kati arutsü.
Tesüiba hopta tetenzüklen Washington nung osangbenertem den jembiba mapang Foreign Affairs Adviser Sartaj Aziz-i ashiba agi, Pakistan-i mezüngbo F-16 ter ser ti (18) alitsü asoshi asüngdang ajisüaka sen dak tsükdakba ajanga ti dang alitsü renemogo. Iba tayimtsü ya kiralongar den raratsü asoshi kanga nüngdakba oset ka lir, ta pai shisem.