US-i Pak dang kiralongraba anema raratsü mepishiogo

Bhubaneshwar, December 14 (Agencies): United States-i Pakistan linük dang rara proker Islamic teloktem anema raratsü mepishiogo, ta Hombar nü Bhubaneshwar (Odisha) nung US Tir Obama’er ketdangser kati ashi.
Tanü Bhubaneshwar nung US South & Central Asian Affairs Assistant Secretary of State, Nisha Desai Biswal-i, “Tamangba yimsü tenüng amer kiralongrartemi Pakistan densema linük balala aika nung tai maket nisungtem tepseter. Onoki Pakistan dang rara proker Islamic teloktem anema inyaktsü aser kiralongraba anema raratsü mepishiogo,” ta ashi.
India linük hopta ka semdanga Biswal arua lir.
Biswal-i Odisha state semdangba ya tanga kecha masü, saka la Odisha nungi shishilembar ka den kibong küma lir, aser tena America nung mapang talangka alir.
La kinüngbu ya Angul district nungi lir. Küm 10 tejaklen tena kibong akumba sülenbo tang lai mezüng Odisha semdanger.
“US-i teloktep linüktem den senteper alima nung kiralongraba anema raratsü atema inyaker. Islamic teloktem azüoktsü atema onoki Muslim nunger nütsüng alika aliba linüktem nung nüburtem nem tangatetba shisatsü agütsür,” ta lai ashi.
“Kiralongraba onük nung US terataba kecha mali. Onoki kiralongraba anema ajangajanga noktaker,” ta laisa ashi.