US-i raratsü ajungmesor: North Korea

Seoul, April 1 (Agencies) : Honibarnü North Korea, US-i junga mebilemdangi military exercise kar agiba ajanga peninsula nung rara tasen ka adokdaktsütsü tebilemtsü arudaktsür, ta ashi.
Korean Central News Agency (KCNA)-i, B-1B Lancer strategic bomber temi March 15 nungi 30, 2017 tashi Korea anüng nung aiben yimogo, ta ashi.
North Korea nung tongtibang tesemtem aoksaa amaktsü nükjidong yur South Korea anüng nung Guam nungi B-1B tem amshia bomb pokloktsütsü exercise agi, ta kasa osang ajanga metetdaktsü.
US Forces Korea (USFK)-i B-1B bomber ka amshia teloktep exercise agiba metetdaktsüogo aser South Korea indang fighter jet tem amshia March 22, 2017 nü iba mesükba exercise ka agi, ta osangbenertemi ashi.
“Korean Peninsula nung iba bomber benokba ya training sentong ka ajanga benoker. Onoki osang ajakbo mashir,” ta USFK ketdangsertemi metetdaktsü.
Aji oda süaka South Korea defence osang ajanga ashiba agi, taoba hopta ana tsüngda nung US-i Korea anüng ajanga B-1Bs bomber tayimtsütem punguben tashi yimdaktsübaji shitak lir.
Iba inyakyim ya mapa akümdangang shitakba metetdaktsütsü, ta kasa osang ajanga ashi.
KCNA-i, America-i mebilemdangi special forces exercise ka agiogo, aser ibaji ajanga tensa tamajungba kümdaktsür, ta metetdaktsü.
North Korea yimsüsüba yimya US-i anendaktsütsü meranger amai parnoki bilemer.
South Korea aser US na lokteper küm shia agiba defence exercise March ita tetenzük nungi agi. Ajisüaka mapang talangka nungi iba teloktep exercise ngua North Korea-i kanga mepelar.
Taküm küm balaka Pyongyang-i US aser South Korea teloktep yagi Kim Jong-un yimsüsüba nokdangtsü amai bilemba mapang aika nung sayur.