US-i S Korea nung tongpang oset mamenoktsü ajungshir: Xi

Beijing, June 29 (Agencies): US-i par tongpang nung amshitsü missile oset South Korea nung mamenoktsü tajungshiba olen ka China Tir, Xi Jinping-i tanü, Bodbar nü metetdaktsüogo.
North Korea-i par 4 buba nuclear bomb taküm January ita 6 nü tendanga pokdaktsüba sülen par linük nungi kümzüka alitsü nükjidong nung US aser S Korea nati Terminal High Altitude Area Defense (THAAD) ta ajaba missile defence system S Korea nung amenoktsü jembiba osang jangjaogo.
Ajisüaka, “THAAD amenokba ajanga kidangsüa aliba linüktem nem tebilemtsü khuret bener arutsür,” ta shia, China aser Russia nati THAAD manenoktsü takhangba US den taoba mapanga benoka lir.
“S Korea sorkari par lushi nung THAAD amenokdaktsüba jakdang tamasa kanga junga shisadangtsü nungdaker,” ta Xi-i par linük semdangsang, S Korea Ato Kilonser, Hwang Kyo-ahn  den senden amendang metetdaktsü.
N Korea-i tongpang nung amshitsü nuclear osettsüset yanglua kasaji kanga sashia tendangba agi par linük pusemer, China jashidakja lir saka S Korea nung THAAD amenokba ajanga China nema tebilemtsü khuret bener arutsütsü ta China-i metetdaktsüogo.
“China aser S Korea nati aroki lungjemer Korean peninsula nung tongpang nung amshitsü nuclear osettsüset yanglua kasaji rizüngba maparen anentsütsü ayongzüker. Yamaji inyakba ajanga asen linük ana densemba tesem nung yimji yimjung aser terenelok alitsü,” ta Xi-isa metetdaktsü.