US-i Syria nung tentetba IS anema tesashiba raratsü: Carter

Syria sorkar anemertemi agiba Raqqa yimti nung IS telok züngsemtemi gari nung mener yimdongsüa jajaba sentong ka ayonga agiba noksa nung angur. Syria nung IS telok anema raratsü mulungtetba teloktem ngura, US-i IS telok den tang dang nungi tesashiba raratsü renemba olen ka US Defense Secretary, Aston Carter-i metetdaktsüogo. (Washington, November 09)

 Washington, November 09 (Agencies): United States (US)-i Syria nung tentetba Islamic State (IS) kiralongrar telok anema tang dang nungi tesashiba raratsü renemba olen ka US Defense Secretary, Aston Carter-i yashi Deobar nü metetdaktsüogo.

IS anema raratsü mulungtetba teloktem Syria nung bushitetra, US-i par mitkartem Syria-i tsüngdong yoka IS anema rarabaren nung tongti shilem agitsü renema lir ta pai metetdaktsü.

“Syria aser Iraq na nung tang lendong kanga sashia atalokdaktsüba IS kiralongrartem den raratsü mulungtetba teloktem angutsüji kanga tasak lir. Ajisüaka, IS teloka anema raratsü mulungtetba teloktem dang ngutetra, ozü US mitkartem Syria-i tsüngdong yoka item teloktem nem nungdakba terenemshiba agüja parnok nungita yaritsü asoshi ozü lenisang, Barack Obama-i lemtetogo,” ta pai ashi.

Paisa ashiba agi, tan bushiba teloktemi IS madak takok ngua raraba den külemi, parnoki Syria aser Iraq na nung tensa azüokteta yimji yimjung tia bener arutsütettsüla.

“Item teloktemi kiralongrartem alidak bushiteta item teseptem nung bomb-tem tsükdakja maktetsüsa osang shitak agütsütetsüla, IS den sentakba itangitsü osangtsüsang tejangja agütsütsüla aser par telok nung züngsem tajemba agi nisung 50-bosa alitsüla,” ta Carter-i sangoktsü.

US-i tanü tashi nung par mitkartem Syria-i tsüngdong yoka tongpang raradakja mali saka tan bushiba teloktemji dang ngura, par mitkartema Syria-i tsüngdong yoktsü mulunga aliba olen ka pai metetdaktsüogo.

“IS telok ya Middle East dang masü saka, US densema alima tesem balala nung lendong atalokdaktsütsü tenzükba tongti kiralongrar telok lir,” ta shia, par telok meshimeshia samatsütsüji kanga dang tongtipang ta Carter-i ashi.

Ano külen, US-i aniba alima teloktep mitkartemi par tayimtsü amshia Syria aser Iraq naprongla nung IS telok anema rarabaren taoba mapang nungi tesashiba inyakba osang ka US Senate Intelligence Committee nung mendenbuba, Senator Diane Fienstein-ia yashi metetdaktsüogo.

IS telok anema raraba maparen nung Russia-ia tongti shilem agiba ajanga alimai par telok madak takok tulu angutsü ta laisa shisem.