US-i tenokdangba sentongtem agientsü ajungshir: Cuba

Havana, October 22 (Agencies): US-i küm 55 tejaklen nungi tenzüka benokba rongsenren aser shishilembatsü tenokdangba sentongtem agientsü tajungshiba olen ka Cuba-i US Congress den benokshiogo.
“US aser Cuba na tsüngda tesendaktep tajungba akümtsü tenzükogo. US-i Cuba anema benokba tenokdangba sentongtem agientsü asoshi nübur tejangraba lir aser US Congress yimsüsürtemi nüburtemi aginüba ama inyaktsü ajungshir,” ta Cuba Deputy Foreign Minister, Abelardo Moreno-i metetdaktsü.
US kübok Florida International University-i taoba September ita nüburtem rong nungi osangtsüsang agiba mapatong ka agiba sülen US nung alir Cuban-American nübur noklang nung shilem 63 tashi Cuba anema benokba tenokdangba sentongtem agiendaktsünüba osang bushitet. Parnoki taoba mapangbo US linüki Castro-i aniba Cuba den mesendakteptsü ajungshia aruba osanga bushitetogo.
US Tir, Barack Obama-ia Cuba anema benokba tenokdangbaren agientsü mapatong taoba mapang tenzüktsü saka tanü tashi US-i Cuba anema benokba tenokdangba sentong timbaka magieni lir.