US-i tezüngzüktep raksara, tapet telangzüba agütsütsü: Ayatollah

Tehran, November 23 (Agencies): United States (US) linüki nuclear tezüngzüktep raksa, par linük anema küm 10 tashi tenokdangba sentong benokshitsü renemra, par Iran-ia tapet telangzüba agütsütsü ta shia, Iran Supreme Leader, Ayatollah Khamenei-i amokmerentsü olen ka tanü, Bodbar nü sangoktsüogo.
Iran anema maneni taruba küm 10 tashi Iran Sanctions Act (ISA) tenokdangtsü sentong tanaben benokshitsü onük US House of Representatives yimsüsürtemi taoba hopta agizükba osang jangjaogo.
Iran linüki tongpang nung amshitsü nuclear osettsüset yanglutsü atema par energy industry rendaktsüba maparen nokdangtsü nükjidong nung par linük anema ISA tenokdangtsü sentonji 1996 küm mezüng benoka liasü.
Iba tenokdangtsü sentongji tanaben mebenokshira, kasaji taküm 2016 küm tatemlen tembangtsü lir.
House of Representatives-i agizük aka, Iran anema ISA tenokdangtsü sentong benokshitsü onükji ozüng küma benshitsü atema US Senate-i agizüka, US Tir, Barack Obama-i pa maitsü ajenoktsütsü anünga lir.
Iran-i par nuclear mapatong anentsü melena, alimai-a par linük anema benokba tenokdangba sentongtem agientsü asoshi Iran aser alima tashi abenba linüktemi JCPOA ta ajaba nuclear tezüngzüktep yaküm, 2015 küm agia liasü.
“Tang US yimsüsütsü tashi abenba sorkari nuclear tezüngzüktep aiben raksaogo. Tezüngzüktep raksaba maparenji tan tesüsa ozü Iran anema maneni taruba küm 10 tashi tenokdangba sentong benokshitsü onük agizükbaji lir. Par linüki tan renemba ama inyakra, ozü Iran linükia tapet telangzüba agütsütsü renema lir,” ta Ayatollah-i nenshia ashi.