US-i Tunisia den tongti tezüngzüktep ishika agiogo

Tunis, November 14 (Agencies): US-i Arab Spring ta ajaba tongti longkak aittsüren tenzükdak, Tunisia nung terenlok lidaktsütsü alizüng ayuba olen ka US Secretary of State, John Kerry-i yashi Hokolbar nü metetdaktsüogo.
Kerry-i yashi Tunisia semdanga par lenirtem den ajurutepba sülen par linük ana tsüngda rongsenren aser linük kümzüka ayutsüren densema, tongti tezüngzüktep ishika agia liasü.
“Tunisia indang rongsenren jenjang tajungba kümdaktsütsü nükjidong nung ozü US-i dollar sen million 700 dak tema Tunisia sorkar nem 2011 küm agütsüogo. Ano, tarutsü mapang nunga ozü US-i Tunisia sorkar nem nungdakba senotsü teyari agütsütsü renema lir,” ta Kerry-i metetdaktsü.
“Kiralongrartemi kidangsüa aliba Libya linük nung tesep tenteta lendong balala atalokdaktsütsü tenzükba mapang nung US-i ozü arrtsü ajunga kümzüka ayutsü maparen nung yariteptsü asoshi nangzükba atema US dang pelaba metetdaktsür,” ta Tunisia Foreign Minister, Taieb Baccouche-ia metetdaktsü.