US-i Ukraine maneni nungita yaritsü nangzüker: Joe Biden

Kiev, December 08 (Agencies): US-i Ukraine maneni nungita yaritsü tenangzükba olen ka US Tatong Tir, Joe Biden-i tanü Mongolbar nü metetdaktsüogo.
“Russia-i Ukraine ket nungi Crimea peninsula tashiyim agi agiba maparen ozü US-i kodanga magizüktsü,” ta shia, par US-i Ukraine maneni nungita yaritsü tenangzükba olenji Biden-i tanü metetdaktsü.
Biden-i Ukraine semdangba maparen tembanga Ukraine parliament senden nung tanü o jembia shilem agidang iba tenangzükba olenji sangoktsü.
“Russia-i Ukraine tensa tajungba kümdaktsütsü asoshi Minsk nung agiba yimjüng tezüngzüktep raksaba atema par linük aitsür,” ta Biden-i ashi.
“Ukraine indang tarutsü tensa mejungi akümtsü ana nung dang lir,” ta shia, Ukraine yimsüsürtemi ochimashi anema raratsü tajungshiba olen ka pai tanü senden nung ajungshia liasü.
Ano, Russia-i tashiyim agi pua ayuba Ukraine nunger helicopter tayimtsü anishir, Nadiya Savchenko indang otsü alima dang metetdaktsütsü tenangzükba olen ka Biden-i metetdakja liasü.
US-i Ukraine nem teyari sen dollar sen million 190 tashi agütsütsü tenangzükba olen ka Biden-i yashi, Hombar nüa sangoktsüba osang jangjaogo.
Ukraine nung nungdakba temelenshi agitsü aser ochimashi inyakba maparen anema raratsü nung amshidaktsütsü nükjidong nung iba teyari senji agütsütsü nangzük.
“Ukraine tensa tajungba kümdaktsütsü aser Ukraine nung terenlok alitsüji kanga dang tongtipang,” ta Ukraine Tir, Petro Poroshenko den yashi ajurutepdang Biden-i lemsatepa liasü.
“Ukraine nung yimjung alitsü den sentakba temelenshi agiba, taoba mapang aibelena inyakbaren agienba, yimsüsütsüren tajungba akümba aser temzüng ozüng takangba küma benshiba ajanga Ukraine linük jenjang tajungba akümtsü,” ta Biden-i shisem.
Ukraine sorkar aser Russia-i pusemba sorkar anemer na tsüngda taoba ita 18 tsüngda nung nisung 8000 shi tepseta tongpang kanga sashia raraba sülen taküm February ita nungtu yimjung tezüngzüktep ka Minsk nung agi saka iba tezüngzüktepji agiba sülena par telok ana tsüngda Ukraine anüdoklen mapang shia tongpang raraba osang bushiteta lir.
Russia-i 2014 küm tetenzüklen Crimea peninsula tashiyim agi agiba sülen tan agi Ukraine pezübenbuba atema Ukraine semdangsang, Biden-i tan anogo ana agia Ukraine semdanger lir.