US-i Venezüela nem tenokdangba tasen agütsür

Washington, Metsüremi/March 02 (Agencies): Timtema aliba Venezuela linük nem teyari koma agütsütsü ta United States aser Russia tsüngta Hokulbarnü mangatettep adoka liasü, kong Moscow-i teyari osettsem ya Tir Nicolas Maduro ajanga agütsütsü nangzük aser US-i teyari agütsüba arrtsü alema meyoki nokdangba asoshi Washington-i tenokdangba tasen agütsüogo.
Tenokdangba kecha melie teyari osettem Venezuela nem agütsütsü asoshi US aser Europan linüktemi UN Security Council nung onük ka benokba Russia aser China linüki veto tashi amshia magizük. Taoba hopta tatemlen US-i anir linük kari Venezuela nem teyari osettem bener otsüba convoy ya Venzuela mitkar ketdangser trok-i nokdang, ta US-i ashir.
Jang, aonsotsü aser tanga chiyongtsü metric tonne 178 bener Venezuela linüki aitsü merang saka Maduro’er sepaitemi nokdangba mapang nisung pezü taküm sama. Item teyari agütsüba ya US-i linük amaktsü merangba tasalentong ka lir, ta Maduro-i ashir.
“Onoki Maduro’er security force züngsemtem nem tenokdangba agütsür, aser iba ya shiranger aser aya nung aliba Venezuela nübur nem agütsütsü bener yokba chiyongtsütem rongdokja nisung tepsetba mechi lir,” ta Treasury Secretary Steven Mnuchin-i sangdong ka ajanga ashi.
Item sepai tanishir trok rongnung Venezuelan National Guard tanishir Major General Richard Jesus Lopez Vargas densema lir. Iba tenokdangba ajanga United States nung parnok indang rongsen ajunga sota ayutsü aser parnok den senotsü amshia inyaksangshir ajunga nem temerenshi agütsütsü.
Maneni United States-isa ketdangser ter dak tali aser par kinungertem indang visa meyiba meshiogo, ta iba tebilemtsü asoshi US special representative, Elliott Abrams-i ashi.
Venezuela opposition lennir Juan Guaido, shiba Washington-i interim president ta agizüka lir, pai item teyari osettem ya linüki bener aittsü teimla tulu liasü, koba United States-i Colombia aser Brazil den yarirtepa bendener agütsüba lir.
Venezuela nem teyari magütsüra nisung 300,000 asütsü, ta Guaido-i ashir. Iba linük nung nüngdakba osettem agimaa socialist rongsenketsüng tia tamajungba akümba ajanga 2015 küm nungi tenzüka Venezuela nunger nisung million 2.7 linük toktsür jenogo, ta United Nations ajanga ashi.
Linük 50 dak tali-i Guaido ya Venezuela tir ka ama agizükteta lir, saka Maduro ya Russia-i kanga sashia busemer, shibai US-i shilem agiba anema nokdaker. Maneni China-i Caracas nem sen dollar billion aika aputsüba aoshia shisabulua bilemer.
Russian Foreign Minister Sergei Lavrov-i Moscow nung Venezuelan Vice President Delcy Rodriguez agizükba mapang, Russa-i wheat tonne 7.5 yokba sülen ano mozü tali yoktsü tebilemba lir, ta ashi.
“International arena nung onok kanga junga osang agiteper,” ta Lavrov-i ashi.
“Arrtsülen lendong agüja linük telungzük inyakyim nung shilem agir ta angazükogo,” ta pai ashi.
US envoy Abrams-i ashiba agi, Maduro’er sepaitem yagi Russia nunger teyari ya yimten yimsüsüba tsütsü hadir ka kümdakja pa busemer nem dang agütsütsü.
“Onoki Venezuela nüburtem nem teyari agütsüner ta ajaki meteta lir; onoki ochi mashi yimsüsür nem agütsünür masü,” ta Abrams-i Washington nung osangbener dang ashi.
Linük balalai shilem agiba ajanga Washington-i Venezuela nung mitkar tashi amshitsü merangba ajema akümtsü imlar, ta Lavrov-i ashi.
United States-i Europe anüdoklen linük nungi prangbong tila, mortar launchers aser shoulder-fired anti-aircraft missiles alizüka Venezuela anasa ayutsü sentong lir, ta pai tai tongloktsü.
US Tir Donald Trump-i Venezuela nung mitkar tashi amshitsü atema jembia mali aser US tembar linük temia mitkar tashi amshiba nungbo meyaritsü ta shia lir.
Taoba ita nungi tenzüka linük 50 dak tali-i arishi küm 35 tain Guaido ya tir ka ama agizüka lir, shibai Venezuela nung telemsa agi sünger aliba opposition tem longjemdaktsü.
Maduro-i bendangleni aotsü asoshi tenokdangba agüjaka Guaido-i Colombia-i oa teyari bener arutsü merang aser yangji US Vice President Mike Pence ajurua liasü.
Pai maneni Brazil linük semdanga yangji right-wing tir tasenba, Jair Bolsonaro ajuru aser Hokulbarnü Paraguay linüki ao.
Guaido ya Maduro sepaitemi aputsü ta amokmerenaka Hombarnü tashinung kidangi meyipa aotsü, ta Brehostibarnü Brasilia nungi osangbener dang ashi.